Пракурор запатрабаваў прысудзіць Шчукіна да месяца арышту :: Хартыя'97 :: Навiны

Месяц арышту і кампенсаванне маральнай шкоды ў памеры 500 тысяч рублёў запатрабаваў для праваабаронцы Валерыя Шчукіна ў якасці пакарання дзяржаўны абвінаваўца. Пракурор таксама заявіў, што Шчукін павінен аплаціць 170 тысяч рублёў штрафу, нібыта не выплачаныя ім яшчэ ў 1999 годзе за ўдзел у “Маршы Свабоды”.

65-гадоваму праваабаронцу інкрымінуюць артыкул 189 Крымінальнага кодэкса, вінавацячы ў абразе сябраў і працаўнікоў апарата выбарчых камісій падчас кампаній па выбарах дэпутатаў мясцовых Саветаў 25-га склікання.

Праваабаронцу абвінавачваюць у абразе старшыні акруговай камісіі Алы Калеснік; намесніка старшыні акруговай камісіі Таццяны Укражэнкі; сябра акруговай камісіі Надзеі Агеевай; сябра апарата абласной камісіі Таццяны Буевіч.

Пасля выбараў у мясцовыя Саветы, якія прайшлі ў Беларусі 14 студзеня 2007 года, праваабаронца распаўсюджваў улёткі, у якіх паведамлялася, што сябры выбаркамаў удзельнічалі ў фальсіфікацыях вынікаў выбараў.

Прысуд Шчукіну будзе вынесены ў 14.00.