У Менску пройдзе ўрачыстая працэсія каталікоў :: Хартыя'97 :: Навiны

Урачыстая працэсія каталікоў адбудзецца ў нядзелю, 10 чэрвеня, па вуліцах Менска. Традыцыйнае штогадовае шэсце прымеркаванае да аднаго з самых яркіх свят Рымска-каталіцкай царквы – Урачыстасці Найсвяцейшых Цела і Крыві Хрыста.

Як паведаміў карэспандэнту БелТА адказны за СМІ пры сакратарыяце Канферэнцыі каталіцкіх біскупаў у Беларусі ксёндз Аляксандр Амяльчэня, само свята адзначаецца ў чацвер, 7 чэрвеня, аднак шэсце пераносіцца на бліжэйшую нядзелю, каб у ім узалі ўдзел як мага большая колькасць вернікаў. Чакаюць, што ў працэсіі возьмуць удзел 5–7 тыс. каталікоў.

Па традыцыі свята пачынаецца ў 9.00 святочнай месай ля сцен Найсвяцейшай Троіцы (святога Роха) на Залатой Горцы. Набажэнства правядзе Апостальскі Адміністратар Менска-Магілёўскай архіепархіі Антоній Дзям’янка. Ад сцен гэтага храму працэсія пойдзе па ходніках вуліц Казлова, праспекта Незалежнасці, вуліц Берсана, Валадарскага, Інтэрнацыянальнай і да галоўнага каталіцкага храма Беларусі – Архікафедральнага касцёла імя Найсвяцейшай Панны Марыі.

На час шэсця будуць адмененыя месы ва ўсіх касцёлах Менска.