Завяршылася сустрэча Генеральных сакратароў епіскапатаў Еўропы (Фота) :: Хартыя'97 :: Навiны

Святою Імшою з Нешпарамі ў касцёле святых Сымона і Алены ўвечары 16 чэрвеня завяршылася праца 35-й сустрэчы Генеральных сакратароў канферэнцый каталіцкіх біскупаў Еўропы. У гэты дзень Касцёл успамінаў у літургіі Беззаганнае Сэрца Марыі.

Цэлебрацыю святой Імшы, у якой бралі ўдзел Генеральныя сакратары разам з Апостальскім Адміністратарам Мінска-Магілёўскай архідыяцэзіі біскупам Антоніем Дзям’янкам, а таксама Апостальскі Нунцый у Рэспубліцы Беларусь арцыбіскуп Марцін Відавіч, узначаліў нарвежскі біскуп нямецкага паходжання Георг Мюллер, Генеральны сакратар епіскапату краінаў Скандынавіі.

У сваёй гаміліі біскуп Мюллер засяродзіўся на непарыўнай сувязі двух Найсвяцейшых Сэрцаў — Езуса і Марыі. Сэрца Божага Сына пачало біцца пад Беззаганным Сэрцам Маці, і Яе Сэрца — гэта самы блізкі і надзейны шлях да Езуса. Пасля святой Імшы ў Чырвоным касцёле адбыўся святочны канцэрт у гонар высокіх гасцей.

На нядзелю для ўдзельнікаў сустрэчы запланавана выключна культурная праграма. Яны наведаюць Нясвіж, дзе ў касцёле Божага Цела Апостальскі Адміністратар Мінска-Магілёўскай архідыяцэзіі біскуп Антоні Дзям’янка ўзначаліць цэлебрацыю святой Імшы, пасля чаго Генеральныя сакратары наведаюць Мір, Івянец, Навагрудак і завершаць апошні дзень прабывання ў Беларусі кароткай экскурсіяй па Мінску паведаміў сайт Catholic.By.

Сустрэча Генеральных сакратароў епіскапатаў Еўропы

Фота В. Кучаравага