Міністр фінансаў пераблытаў даклад. Але «дэпутаты» ўсё роўна прагаласавалі «за» :: Хартыя'97 :: Навiны

Учора ў “парламенце” міністр фінансаў Мікалай Корбут прадстаўляў адразу два законапраекты. Абодва яны тычыліся падаткаў пры гандлі з Расеяй. Калі міністр фінансаў пачаў чытаць даклад па першым законапраекце, спікер “парламента” Уладзімір Канаплёў нават пацікавіўся, ці не пераблытаў ён пытанне. Аднак Мікалай Пятровіч працягнуў свой даклад, як ні ў чым не бывала. “Дэпутаты” пасля выступу задавалі пытанні, а потым прагаласавалі “за”. І толькі пасля гэтага высветлілася, што законапраекты ўсё-ткі пераблыталі. Прагаласавалі за першае пытанне, а даклад міністр прачытаў да другога пытання.

– Мікалай Пятровіч, ну я ж у вас пытаў! – абурыўся спікер.

– Калі разглядалі гэтыя два дакументы, яны разам былі, – апраўдваўся міністр фінансаў.

У выніку, галасаванне прыйшлося адмяніць, і дэпутаты па другім разе націснулі кнопкі “за”, паведаміла «КП в Беларуси».

Законапраекты, якія “разглядаліся”, называліся: «Аб праекце закона РБ аб ратыфікацыі пратаколу паміж урадам РБ і ўрадам РФ аб парадку збірання ўскосных падаткаў пры выкананні прац, аказанні паслуг” і “Аб праекце закона аб прыняцці пратаколу паміж урадам РБ і ўрадам РФ аб занясенні змены і дадаткаў у пагадненне паміж урадам РБ і ўрадам РФ аб прынцыпах збірання ўскосных падаткаў пры экспарце і імпарце тавараў, выкананні прац, аказанні паслуг, ад 15 верасня 2004 года”.