Міліцыя 8 гадзін трымала пастара ў багажніку мікрааўтобуса :: Хартыя'97 :: Навiны

Суд Цэнтральнага раёна Менска 25 чэрвеня адхіліў скаргу пастара суполкі "Ян Прадвеснік" Аб`яднанай царквы хрысціян веры евангельскай у Рэспубліцы Беларусь Антонія Бокуна на жорсткае абыходжанне з ім супрацоўнікаў міліцыі 4 чэрвеня. Як паведаміў БелаПАН А.Бокун, разгляд скаргі, які праводзіў суддзя Валеры Есьман, цягнуўся не больш за пяць хвілін, уключна вынясенне рашэння. Жорсткім абыходжаннем пастар лічыць яго васьмігадзіннае знаходжанне ў багажнай частцы міліцэйскага мікрааўтобуса "ГАЗ", не абсталяванай для перавозкі людзей.

На пляцоўцы каля трох квадратных метраў знаходзіліся яшчэ шасцёра студэнтаў, затрыманых за несанкцыянаванае шэсце. Сам А.Бокун, які пакутуе на гіпертанію 3-ай ступені, быў затрыманы за правядзенне несанкцыянаванага набажэнства і 4 чэрвеня асуджаны на трое сутак адміністрацыйнага арышту.

Скарга пастара на рашэнне суду Цэнтральнага раёна аб накладанні адміністрацыйнага арышту будзе разглядацца 26 чэрвеня ў Менскім гарадскім судзе. У гэты ж дзень суд Цэнтральнага раёна разгледзіць скаргу на рашэнне аб дэпартацыі з Беларусі пратэстанцкага прапаведніка грамадзяніна Польшчы Яраслава Лукасіка.

А.Бокун таксама паведаміў, што 25 чэрвеня атрымаў адмову ў арэндзе памяшкання ў будынку Рэспубліканскага Палаца культуры прафсаюзаў для правядзення набажэнстваў. У дакуменце за подпісам намесніка кіраўніка адміністрацыі Цэнтральнага раёна Менска Мікалая Бурага гаворыцца пра немагчымасць сумяшчэння штотыднёвых набажэнстваў суполкі з асноўнымі кірункамі дзейнасці РДК прафсаюзаў па культурным абслугоўванні насельніцтва.

Паводле інфармацыі пастара, царква "Ян Прадвеснік" падала зварот у адміністрацыю Цэнтральнага раёна, у якім просіць дазволіць правядзенне набажэнстваў у будынку па Даўгінаўскім тракце, дзе раней збіраліся вернікі.