Расейцы кампенсавалі шкоду беларусам толькі часткова :: Хартыя'97 :: Навiны

Расейская кампанія "Западтранснефтепродукт" выплаціла Br2 млрд. у якасці кампенсавання за шкоду, прычыненую аварыяй у Бешанковіцкім раёне Віцебскай вобласці, паведаміў першы намеснік міністра прыродных рэсурсаў і аховы навакольнага асяроддзя Аляксандр Апацкі.

«Па ацэнцы нашых спецыялістаў, "Западтранснефтепродукт" выплаціў недастатковую суму для кампенсавання ўсіх наступстваў ад аварыі ў Бешанковіцкім раёне", – сказаў суразмоўца агенцтву БелТА. Рэальная лічба кампенсавання ў некалькі разоў вышэйшая.

Аляксандр Апацкі распавёў, што Мінпрыроды накіраваў у суд пазоў аб выплаце расейскай кампаніяй астатняй часткі кампенсавання. "Западтранснефтепродукт" прапаноўваў нам працягнуць перамовы па вызначэнні дакладнай сумы кампенсавання шкоды, аднак мы не маем намеру больш ісці насустрач", – адзначыў першы намеснік міністра.

«Мы абапіраліся на кампетэнтныя лабараторныя даследаванні нашых спецыялістаў", – сказаў Аляксандр Апацкі. Іх дакладнасці можна давяраць. У суму кампенсавання Мінпрыроды ўключыла таксама дадатковыя сродкі, неабходныя на прадухіленне наступстваў аварыі, якія могуць выявіцца праз некалькі гадоў.

Пасля дзвюх аварый у Бешанковіцкім раёне Мінпрыроды выступіла з ініцыятывай прыпыніць эксплуатацыю нафтаправода "Западтранснефтепродукта". Праверка Праматамнагляду МНС паказала, што нафтаправод кампаніі працаваў з цэлым шэрагам парушэнняў. Аднак "Западтранснефтепродукт" гарантаваў, што ў будучыні такія інцыдэнты будуць выключаныя.

Нагадаем, 23 сакавіка ў Бешанковіцкім раёне Віцебскай вобласці адбылася значная ўцечка паліва з нафтаправода. Забруджаныя каля 1,2 га. Частка дызельнага паліва патрапіла ў прыток Заходняй Дзвіны – раку Ула. Па папярэдніх дадзеных, рака была забруджаная на працягласці прыкладна 15 км.