Папаўся нецвярозым – падпішыся на «Савецкую Беларусь» :: Хартыя'97 :: Навiны

На ААТ "Полацк–Шкловалакно" завяршылася арганізаваная падпіска на кантраляваныя выданні. Справаздачы здадзеныя ў гарвыканкам.

Калектыў з 4500 працаўнікоў павінен быў выпісаць 735 асобнікаў наступных дзяржаўных газет: «Советская Белоруссия», «Рэспубліка», «Звязда», «Народная газета», «Знамя юности», «Народное слово», «Витебский рабочий», «7 дней», «Полоцкий вестник».. Лідыруе "СБ" – 382 асобнікі. Гэта значыць, адна газета на 12 чалавек, адзначае BulletinOnline.org.

Гэта замацаванае спецыяльным распараджэннем дырэктара прадпрыемства ААТ "Полацк–Шкловалакно" ад 24 траўня. У ім у прыватнасці гаворыцца: "У сувязі з падпісной кампаніяй на другое паўгоддзе 2007 года кіраўнікам, начальнікам структурных падраздзяленняў правесці падпіску на асноўныя кантраляваныя выданні ў колькасці паводле даведзенага плану".

Да дакумента прыкладаецца і табліца з спісам кантраляваных выданняў і колькасцю газет, якія павінны былі выпісаць працаўнікі кожнага цэха.

Для начальнікаў падраздзяленняў абавязковая падпіска – лішні галаўны боль. На іх нясмелыя пярэчанні дырэктар рэагаваў адназначна:

– Гэта не наша ініцыятыва. Указанне прыйшло з адміністрацыі прэзідэнта.

У розных цэхах гэтую праблему вырашалі па-рознаму. У цэху № 9 прымушалі падпісвацца парушальнікаў працоўнай дысцыпліны – спазнелых на працу, прагульшчыкаў, працоўных якія трапілі ў нецвярозым стане.

У цэху № 7 наадварот прымушалі падпісвацца лепшых працаўнікоў, пераможцаў сацыяльных спаборніцтваў. Праўда, у выглядзе заахвочвання ім абяцалі дадатковую прэмію з умовай, што яны выпішуць кантраляваную газету.

Быў і такі варыянт. Начальнік раптам убачыў, што працаўнік чытае газету ў працоўны час: "Так, любіш чытаць, значыць, выпісвай газету або пазбаўлю прэміяльных!"

Пажарнікі таксама занеслі своеасаблівае ўкладанне ў падпісную кампанію. Трапляецца працаўнік з цыгарэтай у неналежным месцы – купляй латарэю або падпісвайся на іх ведамасную газету.

Алена, працаўнік заводакіраўніцтва:

– Я такія газеты прынцыпова не чытаю. І ні хто мяне не прымусіць іх выпісаць.

Пётр, начальнік змены цэха № 7:

– Першыя 3-4 старонкі ў “Советской Белоруссии” – гэта казка пра "белага бычка", а далей чытаць можна. Я пачынаю яе чытаць з апошняй старонкі.

Мікалай, працоўны цэха №10:

– Я даўно ніякіх газет не выпісваю. Усе навіны чытаю ў Інтэрнэце, гэта больш аператыўна і зручна.

Дарэчы Свабодны прафсаюз працаўнікоў ААТ "Полацк–Шкловалакно" выпускае свой інфармацыйны бюлетэнь “Стекляшка”, які распаўсюджваецца бясплатна тыражом 299 асобнікаў. Аднак згодна з іншым распараджэннем дырэктара пранос яго на тэрыторыю прадпрыемства забаронены. “Стекляшка” нібыта адцягвае працоўных ад выканання імі сваёй працы.