Рашэнне аб дэпартацыі польскага прапаведніка засталося ў сіле :: Хартыя'97 :: Навiны

Суд Цэнтральнага раёна Менска 26 чэрвеня адхіліў скаргу дэпартаванага пратэстанцкага прапаведніка, грамадзяніна Польшчы Яраслава Лукасіка на рашэнне аб яго дэпартацыі. Пра гэта БелаПАН паведаміў юрыст Сяргей Луканін.

Паводле яго слоў, суддзя Таццяна Паўлючук прыняла рашэнне не дапускаць да ўдзела ў працэсе адваката Я.Лукасіка Сяргея Лепеша. “Яна матывавала сваю адмову тым, што нібыта была няправільна аформленая даверанасць на прадстаўленне ў судзе інтарэсаў Лукасіка. Больш за тое, яна не задаволіла хадайніцтва аб допыце сведак з боку Лукасіка. У выніку сведкамі выступілі толькі супрацоўнікі міліцыі”, – адзначыў С.Луканін.

27 траўня Я.Лукасік быў затрыманы пасля набажэнства, якое праводзілася ў прыватным доме пастара адной з пратэстанцкіх цэркваў сталіцы. Я.Лукасіка даставілі ва УУС Цэнтральнага раёна Менска і вызвалілі пасля прыезду ў міліцыю консула Польшчы. Я.Лукасік адмовіўся падпісаць пратакол, які быў складзены ў яго дачыненні ў міліцыі, а таксама даць свае адпячаткі пальцаў.

30 траўня за рэлігійную дзейнасць у якасці прапаведніка начальнік УУС Цэнтральнага раёна Менска Віталь Сінякоў аштрафаваў Я.Лукасіка на адну базавую велічыню (31 тыс. рублёў), абвясціў пра яго дэпартацыю з 7 чэрвеня і забарону на ўезд у Беларусь цягам пяці гадоў.