Лукашэнка абяцае адмовіцца ад татальнага кантролю :: Хартыя'97 :: Навiны

"Я гатовы адмовіцца ад практыкі прыняцця рашэнняў па асобных індывідуальных праектах, ухваляючы ў цэлым найбольш перспектыўныя кірункі і пэўныя праекты. Пры гэтым я павінен бачыць, што кожная капейка была накіраваная па прызначэнні", – заявіў Аляксандр Лукашэнка 26 чэрвеня на нарадзе па пытаннях аказання дзяржаўнай падтрымкі арганізацыям рэальнага сектара эканомікі.

Нарматыўна-прававая база па аказанні дзяржпадтрымкі павінна быць падрыхтаваная такім чынам, каб у нядбайных дырэктараў не было магчымасцяў парушаць яе, лічыць Лукашэнка. "Усё павінна быць без белых плямаў", – падкрэсліў беларускі кіраўнік.

Па словах віцэ-прэм`ера Андрэя Кабякова, прыярытэтнымі кірункамі дзяржпадтрымкі павінны стаць падвышэнне эфектыўнасці прамысловай вытворчасці, энергазахаванне, адраджэнне сяла і развіццё рэгіёнаў, паведамляе прэс-служба.

Як адзначалася на нарадзе, урад лічыць неабходным удасканаліць у Беларусі сістэму выдзялення субсідый прадпрыемствам. Гэтаму павінна спрыяць скарачэнне падатковай нагрузкі. У краіне плануецца ўдасканаліць механізм банкруцтва прадпрыемстваў. У прыватнасці, з 2,5 да 6 гадоў прапанаванае павялічыць перыяд санацыі, калі прадпрыемства яшчэ мае магчымасць, рэалізаваўшы нейкі прарыўны праект, пазбегнуць ліквідацыі.

Старшыня Камітэта дзяржаўнага кантролю Зянон Ломаць, у сваю чаргу, паведаміў пра тое, што больш як траціна прадпрыемстваў, якія атрымалі летась дзяржпадтрымку, не выйшлі на запланаваныя паказчыкі вытворчасці. Па яго словах, нараўне з аб`ектыўнымі ёсць цэлы шэраг суб`ектыўных прычын: нізкі ўзровень падрыхтоўкі бізнэс-планаў, неэфектыўнае выкарыстанне атрыманых сродкаў альбо выкарыстанне іх не па мэтавым прызначэнні. Складана ідуць справы ў прадпрыемстваў камунальнай формы ўласнасці, што з`яўляецца вынікам недапрацоўкі аблвыканкамаў, лічыць З.Ломаць.

Падводзячы вынік нарады, А.Лукашэнка заявіў, што ў Беларусі працягнецца практыка аказання дзяржпадтрымкі прадпрыемствам рэальнага сектара эканомікі. "Мы падтрымлівалі і будзем падтрымліваць рэальны сектар эканомікі, але рабіць гэта будзем цывілізавана, з улікам міжнароднага досведу. Толькі на эфектыўныя праекты мы будзем накіроўваць дзяржаўныя рэсурсы", – падкрэсліў ён.