Паўночная Карэя вырабляе плутоній? :: Хартыя'97 :: Навiны

З склада ў ядзерным цэнтры КНДР у Ёнбене зніклі 16 тысяч графітавых стрыжняў, якія могуць выкарыстоўвацца для вытворчасці зброевага плутонію, паведамляе агенцтва ІТАР-ТАСС са спасылкай на японскую газету "Майніці".

Згубу выявілі інспектары МАГАТЭ, якія на мінулым тыдні на працягу двух дзён правяралі аб`екты ў Ёнбене. Крыніца ў міжнародным агенцтве выказала здагадку, што паліўныя стрыжні маглі быць скарыстаныя для вытворчасці зброевага плутонію або іх проста перанеслі ў іншае месца.

У ядзерным рэактары савецкага ўзору магутнасцю пяць мегават, усталяваным у Ёнбене, выкарыстоўваецца восем тысяч графітавых стрыжняў. У лютым 2002 года на складзе было менавіта такая іх колькасць, аднак у траўні 2003 года КНДР абвясціла пра тое, што ўсе яны былі перапрацаваныя.

Амерыканцы сцвярджаюць, што ў выніку Пхеньян мог атрымаць каля 25 кілаграмаў плутонію, якога дастаткова для вытворчасці чатырох–пяці ядзерных бомб. У студзені 2003 года ў паўночнакарэйскі рэактар былі ўсталяваныя новыя графітавыя стрыжні, але ў траўні 2005 года Пхеньян зноў заявіў, што канфіскаваў іх і перапрацаваў.

Нагадаем, 13 лютага 2007 года Паўночная Карэя пагадзілася спыніць працу ядзернага рэактара ў Йонбене ў абмен на павелічэнне аб`ёмаў энергетычнай і гуманітарнай дапамогі. На гэты крок КНДР пайшла пасля таго, як сталі больш жорсткімі эканамічныя санкцыі з боку Рады Бяспекі ААН, якія былі ўведзеныя ў адказ на выпрабаванні Пхеньянам ядзернай бомбы ў кастрычніку 2006 года.

У прызначаны Радай Бяспекі тэрмін рэактар у Ёнбене заглушаны не быў, аднак у канцы чэрвеня памочнік дзяржсакратара ЗША па справах Усходняй Азіі Крыстафер Хілл заявіў, што дасягнутая дамоўленасць аб зачыненні рэактара праз тры тыдні (гэта значыць, у сярэдзіне ліпеня).