За палітычныя прысуды суддзю не пусцяць у Еўропу :: Хартыя'97 :: Навiны

Моладзевыя актывісты дэмсілаў маюць намер дамагацца ўключэння ў спіс неўяздных у Еўропу службоўцаў суддзю суду Цэнтральнага раёна Менска Таццяны Паўлючук. Пра гэта паведаміў БелаПАН адзін з ініцыятараў кампаніі Барыс Гарэцкі.

Па яго словах, падставай для такой ініцыятывы сталі "абсалютна пазапраўныя і палітычна матываваныя" прысуды, якія выносяцца суддзёй. "Таццяна Паўлючук адхіліла скаргу дэпартаванага пратэстанцкага прапаведніка грамадзяніна Польшчы Яраслава Лукасіка на рашэнне аб яго дэпартацыі, пры гэтым не дапусціла да ўдзелу ў працэсе адваката Сяргея Лепеша і сведак з боку Лукасіка. Менавіта яна асудзіла пастара сталічнай царквы "Іаан Прадвеснік" Аб`яднанай царквы хрысціян веры евангельскай у Рэспубліцы Беларусь Антонія Бокуна на трое сутак арышту за правядзенне несанкцыянаванага набажэнства. Апошняй кропляй стала асуджэнне ёю 4 ліпеня да арыштаў на 15 і 10 сутак Алеся Каліты і Паўла Серадзенкі за тое, што тыя ўступіліся за дзяўчыну, якую невядома куды цягнулі людзі ў цывільным", – заявіў Б.Гарэцкі.

"Адпаведная дамоўленасць наконт магчымасці такіх дзеянняў была дасягнутая падчас нашага апошняга візіту ў Страсбург, – адзначыў суразмоўца агенцтва. – Мы дамовіліся, што ўсе нашы паданні ў спіс неўяздных беларускіх службоўцаў будуць разглядацца. Таццяна Паўлючук – першая кандыдатура пасля нашых дамоўленасцяў".