Бундэстаг перанес беларускае візавае пытаньне на восень :: Хартыя'97 :: Навiны

Прыняцьце дакумэнту было заплянаванае на позьні час, на другую гадзіну ночы ўжо 6 ліпеня. Але сёньня ў вылічальным цэнтры Бундэстагу здарыўся пажар, таму не працуюць кампутары. Дэпутаты з тэхнічных прычынаў вырашылі перанесьці заплянаваныя дэбаты, паведамляе «Радыё Свабода».

На разгляд парлямэнтароў падалі два праекты — ад апазыцыі й кіроўчай кааліцыі. Потым высьветлілася, што дакумэнт можна прыняць не раней як а другой гадзіне ночы, калі дэпутаты будуць стомленыя.

Абмеркаваць пытаньне сёньня, падчас апошняга перад летнімі вакацыямі пленарнага паседжаньня, настойвала апазыцыя — фракцыі зялёных ды вольных дэмакратаў.

Упершыню з прапановай перагледзець цэны на візы для беларусаў выступіла дэпутатка ад фракцыі зялёных Марылюіза Бэк.

Менавіта спадарыня Бэк прапанавала зьнізіць візавыя цэны для беларусаў з 60 да 35 эўра. Яна ж ініцыявала адмену візавых збораў для студэнтаў, моладзі, навукоўцаў ды іншых грамадзянаў, што ўдзельнічаюць у праграмах двухбаковага абмену.

Гэтыя прапановы пазьней падтрымалі як у фракцыі зялёных, так і ў лібэральнай партыі — вольных дэмакратаў, — і дэталёва прапісалі ў праекце адпаведнай рэзалюцыі ад апазыцыі.

Паралельна сёньня мелі разглядаць і другі праект, які падрыхтавалі кіроўчыя хрысьціянскія дэмакраты й сацыял-дэмакраты. Паводле апазыцыі, “у гэтым дакумэнце хутчэй выказаныя агульныя пажаданьні, аднак ня ўтрымліваецца нейкай канкрэтыкі”.

Праз адмену дэбатаў абодва тэксты прапануюць на разгляд сяброў камісіі ў міжнародных справах Бундэстагу.

Дэпутаты дэталёва абмяркуюць беларускае візавае пытаньне толькі пасьля летніх вакацыяў, на чарговым пленарным паседжаньні Бундэстагу.

Дэпутатка Бундэстагу Марылюіза Бэк неаднойчы заклікала сваіх калегаў “зразумець усю сур’ёзнасьць гэтай праблемы”, бо “рэальная недасягальнасьць кантактаў з Захадам для большасьці беларусаў толькі на руку рэжыму Лукашэнкі”.