Канфлікт з Расеяй уплывае на стабільнасць беларускага рубля :: Хартыя'97 :: Навiны

З ліпеня Беларусь павінна плаціць за расейскі газ па поўнай. Нагадаем, у першым паўгоддзі краіна аддавала “Газпрому” толькі 55 даляраў за тысячу кубаметраў газу. Цяпер жа трэба будзе плаціць 100 даляраў, ды яшчэ і вяртаць тое, што недаплацілі з пачатку года.

А тым часам краіна ўжо пачала лічыць страты ад нафтагазавага канфлікту з Расеяй. З прычыны таго, што Беларусь цяпер прадае за мяжу менш нафтапрадуктаў, бюджэт, па дадзеных Інтэрфакса, не далічыўся 200 мільёнаў даляраў. Да таго ж Беларусь стала больш грошай марнаваць на расейскія рэсурсы і тавары. За студзень–красавік купілі рэсурсаў і тавараў у Расеі на два мільярды даляраў больш, чым прадалі.

– Гэта ўплывае на стабільнасць нашага рубля, – растлумачыў “КП в Беларуси” эканаміст беларускага даследчага цэнтра ІПМ Аляксандр Чубрык. – Нам трэба дзесьці браць валюту.

З валютай краіне можа дапамагчы крэдыт, які Беларусь просіць у Расеі. Гэта самы просты і хуткі спосаб атрымаць грошы. Паводле дадзеных расейскай газеты “Коммерсант”, цяпер гаворка ідзе нават не пра паўтара, а пра два мільярды даляраў доўгу.

– Чаму Беларусі можа спатрэбіцца больш грошай?

– Гэта танны крэдыт, пад даволі нізкія працэнты. Калі б вы прыйшлі ў банк за крэдытам у пяць мільёнаў, а вам бы прапанавалі яго пад вельмі нізкія працэнты, практычна бясплатна, вы б таксама папрасілі 50 мільёнаў? – прывёў прыклад Аляксандр Чубрык. – Нават калі грошы, якія Беларусь хоча ўзяць у Расеі, размясціць у замежных банках, то зарабіць краіна здолее больш, чым давядзецца вярнуць Расеі.

Зрэшты, расейцы дагэтуль не вырашылі, ці даваць беларусам у крэдыт такую буйную суму. Паводле дадзеных “Коммерсанта”, Беларусь зможа атрымаць грошы толькі для пакрыцця касавага разрыву бюджэту. Прасцей кажучы, калі ў беларускім бюджэце не стане грошай на запланаваныя выдаткі, на гэтую суму і дадуць крэдыт.

– У нашым бюджэце не бывае касавага разрыву ў два мільярды даляраў. Такая ўмова гаворыць пра тое, што расейцы не хочуць даваць Беларусі магчымасць зарабіць на іх крэдыце, а хочуць, каб яго выкарысталі толькі для аплаты расейскага газу.