«Свабодны тэатр» паставіў п`есу пра беларускую сірату Віку Мароз :: Хартыя'97 :: Навiны

Увечары 5 ліпеня пад Менскам адбылася прэм`ера новага праекту "Свабоднага тэатра" "Легенды дзяцінства".

Прадстаўляючы праект, мастацкі кіраўнік "Свабоднага тэатра" Мікалай Халезін назваў яго не спектаклем, а "адкрытай рэпетыцыяй". Калектыў прэзентаваў першую частку праекту, якая носіць назоў "Шрамы дзяцінства", з мэтай ацаніць рэакцыю гледачоў і адкарэктаваць далейшую працу, перадае БелаПАН.

М.Халезін адзначыў, што ў спектаклі, па сутнасці, няма ніякай выдумкі – гэта тыя гісторыі, якія адбыліся ў жыцці акцёраў. Рэжысёр спектакля – Уладзімір Шчэрбань.

Пачынаецца "адкрытая рэпетыцыя" гімнам Беларусі. Яго выконвае "настаўніца спеваў", якая заклікае гледачоў-вучняў "не гундосіць", паўтараць асобныя строфы, а потым нечакана выстаўляе практычна ўсёй зале "нездавальняюча". Сярод іншых дзіцячых успамінаў, расказаных удзельнікамі "Свабоднага тэатра", – шэраг гісторый: з дзіцячага саду, дзе дзяцей прымушалі стаяць галышом на халодным поле ўсю ціхую гадзіну; пра смяротную хваробу маці; пра ўзаемаадносіны з бацькам-"зэкам"; пра першае каханне, якое сканчаецца спробай суіцыду; пра смерць дзіцяці, які пакончыў з сабою пасля выкліку бацькоў да дырэктара школы. У фінале — гісторыя беларускай дзяўчынкі Вікі Мароз: храналогія яе стасункаў з італьянскай сям`ёй, "гвалтоўнага выкрадання" і адпраўкі на радзіму.

Па словах М.Халезіна, пасля прэм`еры першай часткі праекту пачнецца праца над другой, у якой у ролі акцёраў выступяць гледачы з сваімі гісторыямі. У лістападзе гэтага года "Легенды дзяцінства" будуць прэзентаваныя на тэатральным фэсце ў Хельсінкі (Фінляндыя).