Міліцыянт адмовіўся забіраць грошы ў апазіцыянера :: Хартыя'97 :: Навiны

10 ліпеня падчас судовага разгляду пацярпелы па справе Кастуся Лукашова, супрацоўнік міліцыі Анатоль Сушчэня, адмовіўся ад сваіх матэрыяльных прэтэнзій да Лукашова. Пра гэта БелаПАН паведаміў брат К.Лукашова палітык Вячаслаў Сіўчык. Па яго словах, пра гэта А.Сушчэня заявіў 10 ліпеня падчас судовага паседжання.

Нагадаем, К.Лукашоў быў затрыманы 19 снежня 2006 года. Яму інкрымінавалі наезд на аўтамабілі на супрацоўніка міліцыі 29 сакавіка 2006 года, калі ён забіраў свайго брата Вячаслава Сіўчыка з аддзялення хірургіі 3-га клінічнага шпіталя Менска. У той дзень невядомыя людзі спрабавалі затрымаць В.Сіўчыка нібыта за дробнае хуліганства, аднак з дапамогай брата ў палітыка атрымалася ўцячы.

20 лютага 2007 года К.Лукашоў быў прызнаны судом Ленінскага раёна сталіцы вінаватым у здзяйсненні злачынства, прадугледжанага арт. 364 Крымінальнага кодэкса (гвалт у дачыненні супрацоўніка міліцыі пры выкананні ім службовых абавязкаў). Яго прысудзілі да двух гадоў умоўнага зняволення з адтэрміноўкай выканання прысуду на два гады. Суд таксама пастанавіў спагнаць з К.Лукашова 1 млн. рублёў на карысць пацярпелага міліцыянта Анатоля Сушчэні у якасці пакрыцця маральнай і фізічнай шкоды. Аднак 3 красавіка калегія Менскага гарадскога суду адмяніла гэтае рашэнне суду ў сувязі з скаргай адваката. Абарона лічыць, што ў дзеяннях Лукашова адсутнічае склад злачынства. Справа была накіраваная на паўторны разгляд.

10 ліпеня суд Ленінскага раёна Менска заслухаў паказанні сведак, якія не з`явіліся ўчора. Таксама выступілі пракурор і адвакат. "Пракурор прасіў суд пакінуць у сіле папярэдняе рашэнне суду – два гады ўмоўна, пры гэтым лічачы, што няма ніякіх падстаў не давяраць пацярпеламу А.Сушчэні. Адвакат Лукашова Валянціна Шыханцова на падставе сведкавых паказанняў, наадварот, лічыць, што ў дзеяннях К.Лукашова няма складу злачынства або правапарушэння, і на гэтай падставе просіць яго цалкам апраўдаць", – паведаміў В.Сіўчык.

Рашэнне суду будзе вынесенае 11 ліпеня.