Не рэгіструюць, але судзяць :: Хартыя'97 :: Навiны

Упраўленне юстыцыі Менгарвыканкама адмовіла ў рэгістрацыі менскай гарадской грамадскай арганізацыі "Малады Фронт". Пра гэта 10 ліпеня на прэс-канферэнцыі ў Менску паведаміў адзін з заснавальнікаў гэтага грамадскага аб`яднання Барыс Гарэцкі. Цяпер абвінавачванні ў парушэнні артыкула 193 Крымінальнага кодэкса (“дзейнасць ад імя незарэгістраванай арганізацыі”) прад`яўленыя двум актывістам “Маладога Фронту” – Яраславу Грышчэні і Івану Шыле. Лідэр “Маладога Фронту” Зміцер Дашкевіч прысуджаны да 1,5 гадоў пазбаўлення свабоды ў калоніі агульнага рэжыму таксама за “дзейнасць ад імя незарэгістраванай арганізацыі”.

Гэта ўжо другая адмова ўпраўлення юстыцыі Менгарвыканкама. Нагадаем, раней упраўленне юстыцыі Менгарвыканкама адмовіла маладым людзям у рэгістрацыі грамадскага аб`яднання, спаслаўшыся на неадпаведнасці ў статуце грамадскага аб`яднання. Паводле статуту, вышэйшым кіруючым органам з`яўляецца цэнтральны савет, а дакументы ва ўпраўленні юстыцыі былі пададзеныя ад імя ўстаноўчага з`езду.

"Мы выправілі ўсе недахопы, на якія звярнула нашу увагу ўпраўленне юстыцыі. Тым не менш, сёння нам паведамілі, што ў рэгістрацыі арганізацыі нам адмоўленае. Сёння–заўтра мы атрымаем пісьмовую адмову ў рэгістрацыі і адразу ж абскардзім гэтае рашэнне ўпраўлення юстыцыі Менгарвыканкама ў судзе", – заявіў Б.Гарэцкі.

Як лічыць моладзевы актывіст, дзеянні ўпраўлення юстыцыі не маюць нічога агульнага з законам. "Мы так лічым таму, што ўпраўленне юстыцыі Менгарвыканкама, у выпадку выяўлення якіх-небудзь іншых неадпаведнасцяў, павінна было папярэдзіць нас у першай адмове ў рэгістрацыі арганізацыі. Яно, мабыць, гэтага не зрабіла", – сказаў Б.Гарэцкі.

Па яго словах, судовы працэс, калі ён будзе пачаты, стане "абсалютна выйгрышным" з боку арганізацыі, якая ствараецца.