Тоні Блэр дэбютуе ў якасці блізкаўсходняга пасрэдніка :: Хартыя'97 :: Навiны

Спецпрадстаўнікі блізкаўсходняга "квартэта" сустрэнуцца ў аўторак з былым прэм`ерам Вялікабрытаніі Тоні Блэрам, прызначаным на пасаду спецыяльнага прадстаўніка "чацвёркі" пасярэднікаў, і абмяркуюць праблематыку рэгіёна, паведаміў спецпрадстаўнік кіраўніка МЗС РФ па блізкаўсходнім урэгуляванні Сяргей Якаўлеў.

"У аўторак у Лондане з раніцы пройдуць перамовы ў фармаце спецпрадстаўнікоў, а пасля прызначаная сустрэча з Блэрам",– заявіў напярэдадні Якаўлеў "Інтэрфаксу".

Па яго словах, падчас сустрэчы з былым прэм`ерам Вялікабрытаніі плануецца абмеркаваць праблематыку блізкаўсходняга ўрэгулявання. Якаўлеў дадаў, што падчас перамоваў спецпрадстаўнікоў "квартэта" ў Лондане будзе абмяркоўвацца наяўная сітуацыя ў рэгіёне і планы "чацвёркі" на будучыню.

Папярэдняя сустрэча спецпрадстаўнікоў блізкаўсходняга "квартэта", у які ўваходзяць РФ, ЗША, ЕЗ і ААН, адбылася ў канцы чэрвеня ў Іерусаліме.

Пра папаўненне фармату "чацвёркі" блізкаўсходніх пасярэднікаў важкай палітычнай фігурай стала вядома ў канцы чэрвеня: менавіта тады было абвешчанае пра прызначэнне былога прэм`ера Вялікабрытаніі спецыяльным прадстаўніком "квартэта", нагадвае "Інтэрфакс". Як паведаміла тады прадстаўніца ААН Мішэль Монта, на новай пасадзе Блэр будзе, у прыватнасці, займацца пытаннямі аказання міжнароднай дапамогі Палесцінскай аўтаноміі, "цесна супрацоўнічаючы з краінамі-донарамі і каардынуючымі арганізацыямі".

Сама Палесцінская аўтаномія ў апошнія тыдні апынулася фактычна расколатай на два лагеры: пасля ўзброеных сутыкненняў актывісты руху "Хамас" выгналі з сектара Газу прыхільнікаў партыі "Фатх". Пад кантролем апошніх засталіся палесцінскія тэрыторыі ў раёне заходняга берагу ракі Іардан.

Услед за гэтым кіраўнік Палесцінскай нацыянальнай адміністрацыі Махмуд Аббас сфармаваў новы ўрад, ужо без прадстаўнікоў "Хамаса", якіх кіраўнік ПНА пасля падзей у Газе ўпершыню назваў тэрарыстамі. Пра падтрымку новага кабінета міністраў палесцінскіх тэрыторый тут жа заявілі ЗША, ЕЗ і Ізраіль.

У Маскве таксама прывіталі фармаванне новага ўрада і выказалі надзею, што ён зробіць усё магчымае і неабходнае для спынення міжпалесцінскага супрацьстаяння.