Шэйман з`ехаў да Чавеса :: Хартыя'97 :: Навiны

Беларусь і Венесуэла маюць намер выпрацаваць сумесныя меры, накіраваныя на падвышэнне эфектыўнасці беларуска-венесуэльскага супрацоўніцтва, і надаць яму неабходную дынаміку. Гэта асноўная мэта распачатага афіцыйнага візіту ў Венесуэлу беларускай урадавай дэлегацыі на чале з дзяржаўным сакратаром Савета бяспекі Віктарам Шэйманам.

Як паведамляе БелТА, у складзе беларускай дэлегацыі – кіраўнікі і спецыялісты галіновых міністэрстваў і найбуйнейшых айчынных прадпрыемстваў.

Венесуэльскі бок надае прыярытэтнае значэнне супрацоўніцтву з Беларуссю. Гэта паказалі вынікі ўжо першых перамоваў, праведзеных Віктарам Шэйманам з міністрам базавай і горнаруднай прамысловасці Венесуэлы Хасэ Канам, міністрам энергетыкі і нафты Рафаэлем Рамірасам, міністрам інфраструктуры Хасэ Кабеллам, міністрам жылля і жылога асяроддзя Рамонам Карсалесам, міністрам абароны Ранхелем Брысеньё і іншымі афіцыйнымі асобамі, падкрэслілі ў прэс-цэнтры дзяржсакратарыята Савета бяспекі.

Венесуэла гатовая актыўна вырашаць пытанні набыцця беларускай прадукцыі, а таксама стварэння на сваёй тэрыторыі сумесных прадпрыемстваў па здабычы нафты, вытворчасці аўтатрактарнай, дарожнай, кар`ернай і бытавой тэхнікі, будаўнічых матэрыялаў і іншых вытворчасцяў, у тым ліку ў сферы паслуг.

На думку спецыялістаў, Венесуэла сёння мае вострую патрэбу ў шырокім спектры прадукцыі і тэхналогіях, што вырабляюцца беларускім народна-гаспадарчым комплексам. Кіраўніцтвам абедзвюх краін падчас перамоваў у Менску ў чэрвені дасягнутая дамоўленасць аб правядзенні ў лістападзе–снежні гэтага года буйнамаштабнай нацыянальнай выставы Беларусі ў Венесуэле з мэтай прэзентацыі беларускай прадукцыі. Падчас візіту плануецца абмеркаваць усе тэхнічныя і арганізацыйныя пытанні практычнай рэалізацыі дадзенага праекту.