Будаўніцтва АЭС у Беларусі турбуе Еўропу :: Хартыя'97 :: Навiны

Беларусь, перш чым прыступіць да будаўніцтва атамнай электрастанцыі, павінна падпісаць дадатковыя дамовы аб нераспаўсюджанні ядзерных тэхналогій у рамках МАГАТЭ, заявіла на прэс-канферэнцыі ў Менску Надзвычайная і Паўнамоцная амбасадарка Францыі ў Беларусі Мірей Мюссо.

Амбасадарка адзначыла, што ў канцы мінулага года ў Францыю накіроўвалася дэлегацыя беларускіх экспертаў для вывучэння функцыянавання атамных станцый у Францыі і папярэдніх перамоваў з кампаніяй AREVA.

Надзвычайная і Паўнамоцная амбасадарка Францыі ў Беларусі Мірэй Мюссо таксама закранула пытанне адмены прэферэнцый ЕЗ для Беларусі. Дыпламат спадзяецца, што дыялог паміж Беларуссю і Еўразвязам па пытаннях захавання правоў прафсаюзаў будзе працягнуты і сістэма прэферэнцый будзе адноўленая.

"Гэта не капрыз з боку ЕЗ (з 22 чэрвеня гэтага года Беларусь выключаная з абагульненай сістэмы прэферэнцый ЕЗ), а следства незахавання абавязальніцтваў, прынятых на сябе ў рамках Міжнароднай арганізацыі працы", – заявіла амбасадарка.

У Беларусі, па словах М.Мюссо, Еўропа чакае прытрымлівання да гэтых прынцыпаў, як свабода слова, сходаў волевыяўлення. "З нашага пункту гледжання, Беларусь, якая так шмат пакутавала ў сваёй гісторыі ад таталітарызму і тыраніі, павінна рухацца ў кірунку дэмакратыі. Траціна насельніцтва Беларусі загінула, абараняючы дэмакратычныя прынцыпы. Дэмакратыя – сутнасць Еўропы. Мы лічым, што Беларусь прывязаная да дэмакратычных прынцыпаў, і мы будзем рухацца разам", – сказала амбасадарка.