Аднолькавыя адпіскі з розных ведамстваў :: Хартыя'97 :: Навiны

Пасля адмены льгот донары Магілёва вырашыліся на актыўныя дзеянні. Яны патрабуюць вярнуць ільготы, а пакуль заклікаюць донараў не з`яўляцца на планавыя нарыхтоўкі крыві на станцыі пералівання. І здаваць кроў толькі ў выпадку ЧП, калі кроў спатрэбіцца дзецям ці цяжкахворым.

– Перапіску з службоўцамі мы пачалі яшчэ да страйку, – распавёў “КП в Беларуси” ганаровы донар Ігар Каваленка. – Пасля адказу з гарвыканкама мы напісалі ў «палату прадстаўнікоў». Днямі атрымалі адказ – копію адказу гарадскіх службоўцаў, толькі даты розныя! Высветлілася, «парламентарыі» перадалі наш зварот «уніз», на мясцовы ўзровень. А нашы службоўцы, не доўга думаючы, выкарысталі стары ліст!

Вось аднолькавая цытата з двух лістоў: «Праява гуманізму і міласэрнасці ў відзе донарства крыві і яе кампанентаў з боку асобных грамадзян пачынае ўспрымацца як праца… Тыя грамадзяне, якія з меркантыльных інтарэсаў лабіявання сабе льгот за тое, што рэгулярна выказваюць акт гуманізму і міласэрнасці ў відзе добраахвотнай здачы крыві і яе кампанентаў, вядома ж, мае права перастаць займацца гэтай дзейнасцю».

– Нас спрабуюць выставіць меркантыльнымі пачварамі! – гаворыць Ігар Каваленка. – А гаворка ідзе пра сапраўды неабходныя выплаты! Пры здачы крыві арганізм губляе карысныя рэчывы, іх трэба аднаўляць. Цяпер мы чакаем адказаў ад Савета міністраў і з Міністэрства аховы здароўя. Калі яны таксама «скапіююць» лісты, гэта стане пачаткам бестэрміновага страйку донараў. А пакуль мы ствараем дабрачынны фонд донараў, які збірае інфармацыю пра тых, хто пацярпеў ад здачы крыві. У 1993 годзе ў Магілёве адбылося масавае заражэнне крыві донараў. Людзі хварэлі сепсісам, гублялі прытомнасць, ляжалі ў рэанімацыі.