Лукашэнку бянтэжыць пакрокавая стратэгія Еўропы, але ён гатовы супрацоўнічаць :: Хартыя'97 :: Навiны

Беларусь гатовая супрацоўнічаць з Еўропай у сферы энергетыкі. Пра гэта заявіў сёння Аляксандр Лукашэнка падчас наведвання трубапракатнага комплексу Беларускага металургічнага завода, адказваючы на пытанні журналістаў. "Мы прапанавалі еўрапейцам: давайце будзем супрацоўнічаць у кірунку бяспекі паставак энергарэсурсаў. Вось галоўнае пытанне, на які мы павінны зважаць. Цяпер ідуць перамовы і кантакты ў гэтым плане, – падкрэсліў кіраўнік дзяржавы. – Гаворка ідзе не пра тое, каб еўрапейцы нам у Беларусі нешта пабудавалі, а пра бяспеку тых транспартных сістэм, якія патрэбныя самім еўрапейцам".

Пры гэтым Лукашэнка адзначыў вялікую забюракратызаванасць "еўрапейскай машыны": "Бюракратызм страшны, інэрцыйнасць, гэтая "машына" круціцца ў адным кірунку, і пакуль певень не дзеўбане, як у народзе гавораць, яны не звернуцца". Аднак, на думку Лукашэнкі ў сувязі з пытаннямі энергетычнай бяспекі, пастаўкамі вуглевадароднай сыравіны праз Беларусь у еўрапейскія краіны значнасць нашай краіны для Еўропы ў энергетычнай сферы будзе ўзрастаць. "Я у гэтым проста ўпэўнены", – сказаў Аляксандр Лукашэнка.

У супрацоўніцтве з ЕЗ кіраўнік дзяржавы лічыць важным канцэнтраваць увагу менавіта на пытаннях энергетычнай бяспекі. "Калі нам еўрапейцы пачынаюць прапаноўваць нейкую пакрокавую стратэгію, супрацоўніцтва, і ўсё гэта схіляецца ў палітычную галіну – маўляў, у нас не тое заканадаўства і гэтак далей, мы ім гаворым: што, у нас няма прадметных тэм для супрацоўніцтва? Ці еўрапейцы ўжо зацыкліліся настолькі, што не бачаць галоўных праблем?", – сказаў прэзідэнт. Аляксандр Лукашэнка падкрэсліў, што цяпер Беларусь іграе важную ролю ў стварэнні бар`ера для наркатрафіку, пазапраўнага гандлю зброяй. "Нямала мы тут працуем на ЕЗ, у тым ліку і ў энергетычнай бяспецы", – дадаў прэзідэнт.

Аляксандр Лукашэнка крытычна выказаўся ў адрас прапанаванай шэрагам еўрапейскіх структур "пакрокавай" палітыкі збліжэння з Беларуссю.

У інтэрв`ю журналістам у пятніцу ў Жлобіне беларускі кіраўнік адзначыў: "Калі еўрапейцы прапаноўваюць нам "пакрокавую" стратэгію, мяне гэта бянтэжыць". "У нас што няма сапраўды сур`ёзных тэм для дыялогу?", – спытаў прэзідэнт.

Сярод найбольш значных праблем, па якіх, на думку А.Лукашэнкі, варта весці дыялог з Еўропай, былі названыя пытанні супрацоўніцтва ў энергетычнай сферы, у барацьбе з наркатрафікам і кантрабандай зброі. Пры гэтым, у сваім адказе, А.Лукашэнка пазначыў факты спынення беларускімі праваахоўнымі органамі спроб пазапраўнай транспартоўкі праз Беларусь у Еўропу кампанентаў для ядзернай зброі.

На думку Лукашэнкі, "пакрокавая" стратэгія – бесперспектыўны шлях, таптанне на месцы". Рабіць што-небудзь з беларускага боку ў абмен на дзеянні з еўрапейскага боку і пры гэтым улічваць вялікую колькасць розных умоў і абгавораў, на думку прэзідэнта Беларусі, не дасць станоўчы вынік.