Гістарычныя будынкі Гародні прададуць прыватнікам? :: Хартыя'97 :: Навiны

У Гародні на аўкцыёне могуць быць прададзеныя будынкі канца XIX – пачатку XX стагоддзяў, якія яшчэ нядаўна планавалася знесці. Пра гэта БелаПАН паведаміў загадчык сектарам па кіраўніцтве, уліку і продажу маёмасці гарвыканкама Вадзім Таранцей.

Пакуль прынятае рашэнне аб продажы будынка гістарычнай каштоўнасці 2-ой ступені па вул. Сацыялістычная, 44 (цэнтр горада). Нежылое двухпавярховае цаглянае памяшканне з склепам і мансардай выстаўленае на аўкцыён, які адбудзецца 13 жніўня. Пачатковы кошт будынка — 810 млн. рублёў. Галоўнай умовай аўкцыёну з`яўляецца захаванне гістарычнага аблічча будынка і ўвядзенне яго ў эксплуатацыю цягам двух гадоў.

Нагадаем, летась гарадзенскія ўлады разам з архітэктарамі прапанавалі стандартную рэканструкцыю гэтага будынка – знос і пабудову на яго месцы такога ж. 19 красавіка 2007 года адбылося паседжанне Беларускага рэспубліканскага навукова-метадычнага савета па пытаннях гісторыка-культурнай спадчыны пры Міністэрстве культуры. Сябры савета падтрымалі праект рэканструкцыі, запатрабаваўшы толькі захаваць пярэдні фасад. Аднак на сёння гарадскімі ўладамі прынятае рашэнне аб продажы будынка.

Краязнаўца Ігар Лапеха ў інтэрв`ю БелаПАН выказаў сваю думку наконт продажу будынка: «Тое, што службоўцы выставілі будынак на продаж, – гэта добры знак, гэта тое, што яны павінны былі зрабіць даўно па законе. Фактычна, яны знімуць з сябе адказнасць за будынак, які знаходзіцца цяпер не ў лепшым стане. Напрыклад, калі б службоўцы (уласнік будынка – гарвыканкам) добрасумленна сачылі за будынкам, то рэстаўрацыю гэтага будынка давялося б рабіць мінімальную, а так яны даводзяць будынак да стану самаразбурэння. Пасля чаго гавораць, што неабходна рабіць рэканструкцыю, бо рэстаўрацыі трухлявы будынак не падлягае».