Улады абяцаюць адкрыць межы :: Хартыя'97 :: Навiны

У Беларусі спачатку будуць скасаваныя выязныя штампы ў пашпартах, а пасля з`явіцца біяметрычныя пашпарты, паведаміў у інтэрв`ю газеце “Советская Белоруссия” ў аўторак міністр унутраных спраў Беларусі Уладзімір Навумаў.

"Да 1 студзеня 2008 года мы плануем адмяніць выязныя штампы ў пашпарце. Ужо ў самыя блізкія 3–4 гады яго павінен замяніць біяметрычны пашпарт", паведаміў ён. Пры гэтым міністр растлумачыў, што "гэта не наша прыхамаць, а міжнароднае патрабаванне. Проста праз 3 – 4 гады без біяметрычнага пашпарта беларуса ў іншую краіну ўжо не пусцяць".

У.Навумаў таксама дадаў: "Хачу супакоіць тых, хто выязджаць за межы краіны не плануе: абавязковай пашпартызацыі не будзе".

Пры гэтым міністр не выключыў, што біяметрычны пашпарт будзе каштаваць дорага. "Бо ў гэты дакумент трэба звесці найдакладнейшую інфармацыю пра чалавека: адпячаткі пальцаў, сятчатка вока, абрысы носу", – сказаў У.Навумаў, дадаўшы, што "такі пашпарт будуць набываць толькі жадаючыя".

Наконт пытанняў па замене прапіскі на рэгістрацыю, кіраўнік МУС растлумачыў: "Спачатку адрозненняў ад прапіскі будзе мала. І замена прапіскі рэгістрацыяй – не наша патрабаванне, а жаданне грамадзян". "Плату за ваду і газ налічаюць па колькасці пражываючых. Да нас прыходзяць пенсіянеры з скаргамі, што ў суседскай кватэры прапісаны адзін чалавек, а рэальна пражываюць чацвёра. І плата за камунальныя паслугі ім ідзе як на 1 чалавека – несумленна! Для гэтага патрэбная рэгістрацыя", – сказаў міністр.

"Будзе выпрацаваная форма абавязковага апавяшчэння чалавека пра сваё перамяшчэнне. Караць за яго невыкананне не будзем, разлік на тое, што законапаслухмяныя людзі будуць пра пераезды паведамляць. Тым больш што з`явіцца адміністрацыйнае пакаранне за само пражыванне без рэгістрацыі – штраф", – растлумачыў кіраўнік МУС.