Навумаў крытыкуе дэкрэт Лукашэнкі :: Хартыя'97 :: Навiны

Міністр унутраных спраў Беларусі генерал-лейтэнант міліцыі Уладзімір Навумаў заяўляе пра неабходнасць распрацаваць новыя меры ў дачыненні бацькоў, якія не пакрываюць дзяржаве выдаткі на выхаванне іх дзяцей.

"Не выключана, што неўзабаве я пайду на прыём да кіраўніка дзяржавы з прапановамі па змяненні дэкрэту нумар 18 – алкаголікаў, прынцыповых "беспрацоўных" і закаранелых злачынцаў у калоніі не перавыхаваюць. Можа, нават наадварот. Таму трэба распрацоўваць іншыя меры", – заявіў Навумаў у аўторак у інтэрв`ю газеце "Советская Белоруссия".

"18-ты дэкрэт Аляксандра Лукашэнкі прысвечаны пакрыццю выдаткаў дзяржавы на ўтрыманне дзяцей, чые бацькі пазбаўленыя бацькоўскіх правоў. Павінен прызнаць, у яго рэалізацыі мы дапускаем нямала перагінаў, завошта міліцыю не раз крытыкавалі. Апошнім разам – у “парламенце”, – сказаў У.Навумаў.

"Дэпутаты выказалі меркаванне працадаўцаў, па-свойму справядліва абураных тым, што міліцыя прымушае іх прымаць на службу тых, хто працаваць не хоча ў прынцыпе. Ды яшчэ і плаціць ім нядрэнную зарплату", – растлумачыў У.Навумаў.

"Але тут з’яўляецца праблема. Калі бацька адмаўляецца працаваць, яго паводле дэкрэту варта неадкладна прыцягваць да крымінальнай адказнасці. І гаворка ідзе не па адным-двух выпадках: на парадку дня лёсу 12 – 14 тысяч грамадзян. Некаторыя працадаўцы гатовыя пералічваць грошы на ўтрыманне некалькіх хлопцаў з прыбытку, толькі каб не важдацца з іх гора-бацькамі. Але гэта не вырашэнне праблемы", – падкрэсліў У.Навумаў.