Лукашэнка звольніў Сухарэнку за «дэманізацыю» Захаду? :: Хартыя'97 :: Навiны

Як вядома, учора Аляксандр Лукашэнка змяніў кіраўніцтва КДБ. Кіраўнік спецслужбы Сцяпан Сухарэнка адпраўлены ў адстаўку «ў сувязі з пераводам на іншую працу». Пра яго новае прызначэнне пакуль не паведамляецца. Таксама быў зняты з пасады намеснік кіраўніка КДБ Васіль Дземянцей. Новым шэфам КДБ стаў генерал-маёр Юры Жадобін.

Былы шэф КДБ 50-гадовы Сцяпан Сухарэнка ўзначальваў спецслужбу з 2005 года, адслужыўшы да гэтага часу 21 год у органах дзяржбяспекі. Напярэдадні прэзідэнцкіх выбараў 2006 года ён абвясціў пра падрыхтоўку апазіцыяй змовы з мэтай сілавога захопу ўлады і паабяцаў, што спробы дэстабілізаваць становішча будуць кваліфікаваныя як тэрарызм.

«Адстаўка Сухарэнкі выглядае лагічна. Ён выканаў свае задачы, асабліва ў перыяд падрыхтоўкі прэзідэнцкіх выбараў», – сказаў «Времени новостей» кіраўнік беларускага аналітычнага цэнтра «Стратэгія» Леанід Заіка. На думку эксперта, былы шэф КДБ «дэманізаваў» Захад і апазіцыю, што магло перашкодзіць імкненню Менска наладзіць стасункі з Еўразвязам.

Зрэшты, незалежны беларускі палітолаг Аляксандр Класкоўскі ў гутарцы з «Временем новостей» зазначыў: «Беларусь засталася адзінай постсавецкай краінай, спецслужба якой працягвае насіць назву КДБ. Калі б Менск хацеў зрабіць сімвалічны жэст у адрас Захаду, ён мог бы памяняць гэтую шыльду».

У нядзелю беларускае тэлебачанне паказала сенсацыйны сюжэт, у якім кіруючыя чыны КДБ распавялі пра раскрыццё ў студзені польскай шпіёнскай сеткі. Леанід Заіка не выключыў, што гэтая інфармацыйная акцыя была няўдалай спробай Сухарэнкі даказаць важнасць сваёй працы.

На фота: новы старшыня КДБ генерал-маёр Юры Жадобін.