Донары прапаноўваюць службоўцам падзяліцца крывёй :: Хартыя'97 :: Навiны

Падрыхтоўку да акцыі па прыцягненні службоўцаў да донарству вядзе аргкамітэт па стварэнні дабрачыннага фонду донараў плазмы і крыві.

Як паведаміў БелаПАН ганаровы донар Беларусі Ігар Каваленка, у прыватнасці, рыхтуюцца маляўнічыя ўлёткі з заклікам да прадстаўнікоў мясцовых улад прыйсці на станцыі пералівання крыві. Плануецца, што гэтыя заклікі ганаровыя донары будуць раздаваць у будынках гарвыканкамаў і аблвыканкамаў.

Па словах І.Каваленкі, для ўлёткі скарыстаны тэкст адказу Магілёўскага гарвыканкама на зварот з нагоды адмен ільгот ганаровым донарам.

20-27 чэрвеня ў краіне прайшла папераджальны страйк донараў, якія спынілі наведваць станцыі пералівання крыві ў знак пратэсту супраць адмены льгот. Пры гэтым зварот донараў у парламент быў пераадрасаваны ў Магілёўскі гарвыканкам. У адказе з гарвыканкама адзначалася, што "сістэма збору донарскай крыві і яе кампанентаў у Беларусі наладжаная і адпрацаваная ўжо шматлікімі дзесяцігоддзямі", і адной з яе складальнікаў з`яўляюцца донары, якія рэгулярна здаюць кроў і яе кампаненты. "Гонар і хвала такім людзям. Мы схіляемся перад гэтымі грамадзянамі, якія выратавалі жыцці тысячам сваіх землякоў", — гаварылася ў лісце гарвыканкама.

Паводле інфармацыі Каваленкі, у перыяд летніх водпускаў Магілёўская станцыя пералівання крыві сутыкаецца з недахопам жадаючых здаць кроў і яе кампаненты, пра што яму стала вядома ў гутарцы з кіраўніцтвам станцыі.

Акрамя гэтага, "паводле заканадаўства, мясцовыя ўлады абавязаныя спрыяць прапагандзе донарства", адзначыў ён.

Па словах І.Каваленкі, плануецца, што акцыя пачнецца ўжо на наступным тыдні.