Вынікі «Басовішча-2007» :: Хартыя'97 :: Навiны

Першы прыз “Басовішча” атрымаў наваполацкі гурт “Фляўс і Кляйнн”, другім ляўрэатам названыя экстрэмальныя менчукі “SOK”, трэцюю ўзнагароду з фэстывалю ў Менск вязе зусім новы фольк-гурт “Unia”, піша Алена Скарабагатава на сайце “Тузін Гітоў”.

Пераможца атрымаў адмысловы прыз “БелСат” – статуэтку і грашовую ўзнагароду ў 5000 польскіх злотых, прыз ад Польскага Радыё для замежжа – 1360 польскіх злотых і 20 гадзінаў запісу з гукарэжысэрам на студыі “Рэмбрант” ад Радыё “Беласток”.

Ляўрэаты другой ступені атрымалі магчымасьць 40 гадзінаў запісу без гукарэжысэра на Apollo Records, грашовую ўзнагароду ад тыднёвіку “Ніва” – 1200 польскіх злотых і 1800 ад “БАС”.

Зусім новы фолькавы гурт “Unia” вяртаецца ў Менск з падарункам у 1000 злотых ад войта Гарадоцкай гміны і адмысловым прызом беларускага Радыё “Рацыя” – 1100 польскіх злотых. Акрамя таго “Unia” атрымлівае ад “Рацыі” гарачую падтрымку і прамоцыю на сайце і гадавую ратацыю ў этэры радыё.

Усе тры пераможцы “Басовішча-2007” атрымаюць прадукцыю кліпаў ад тэлевізіі “БелСат”.

Па дарозе дамоў групу моладзі зь некалькіх дзесяткаў чалавек затрымалі на гарадзенскім чыгуначным вакзале больш за гадзіну, а потым агледзелі рэчы і адпусьцілі. Пра гэта паведаміў “Свабодзе” адзін з затрыманых Віктар Валько. Пяцём маладзёнам, сярод якіх адная дзяўчына, мытнікі зрабілі асабісты дагляд. Сярод іх былі, у прыватнасьці Франак Вячорка і студэнт-каліновец Яўген Скрабутан.