Галандыя хоча бачыць Беларусь свабоднай :: Хартыя'97 :: Навiны

Урад Галандыі цалкам падтрымлівае пазіцыю Еўрапейскага Звязу ў дачыненні Беларусі. Пра гэта заявіў надзвычайны і паўнамоцны амбасадар Каралеўства Нідэрланды ў Польшчы і па сумяшчальніцтву ў Беларусі Марнікс Кроп.

«Мы хацелі б паляпшэння стасункаў, але для гэтага беларускі ўрад павінен зрабіць пэўныя крокі», – адзначыў дыпламат. У якасці такіх крокаў амбасадар назваў вызваленне палітычных зняволеных і імкненне Беларусі паважаць правы чалавека, паведамляе БелаПАН.

«Умовы, сфармуляваныя ЕЗ для ўдзелу Беларусі ў палітыцы добрасуседства, абсалютна разумныя, – падкрэсліў Кроп. – Іх выкананне не з`яўляецца вялікай цяжкасцю для беларускага ўрада». Пры гэтым ён адзначыў, што беларускія ўлады зрабілі «маленькі крок» насустрач ЕЗ, вызваліўшы некалькіх палітвязняў. «Але гэта толькі некалькі чалавек. Астатнія палітвязні, у тым ліку і самы вядомы сярод іх Аляксандр Казулін, дагэтуль знаходзяцца ў турме», – заявіў амбасадар.

Пры гэтым ён падкрэсліў, што калі афіцыйныя стасункі абмяжоўваюцца палітыкай ЕЗ, то двухбаковыя стасункі паміж няўрадавымі арганізацыямі паспяхова развіваюцца. Амбасадар адзначыў, што ў гуманітарнай сферы развіваецца супрацоўніцтва ў рамках дапамогі пацярпелым ад аварыі на Чарнобыльскай АЭС. «Штогод больш як тысяча беларускіх дзяцей адпачываюць у Галандыі. Нашы грамадзяне актыўна ўдзельнічаюць у рэалізацыі гэтай праграмы», — сказаў дыпламат.