«Рух «За Свабоду» прынялі за палітычную партыю :: Хартыя'97 :: Навiны

Міністэрства юстыцыі адмовіла ў рэгістрацыі рэспубліканскага праваабарончага грамадскага аб`яднання "Рух "За Свабоду". Заснавальнікі аб`яднання маюць намер цягам месяца абскардзіць рашэнне Мінюста ў Вярхоўным судзе РБ, падрыхтаваць новы ўстаноўчы сход, а таксама патрабаваць сустрэчы з міністрам юстыцыі В.Галаванавым і адмены рашэння Мінюста.

У афіцыйным лісце аб адмове ў рэгістрацыі Міністэрства юстыцыі спасылаецца на Закон "Аб палітычных партыях". Але паводле свайго Статуту РПГА "Рух "За Свабоду" з`яўляецца грамадскім аб`яднаннем, дзейнасць якога рэгулюецца Законам "Аб грамадскіх аб`яднаннях". Такім чынам, пры разглядзе дакументаў, прадстаўленых на рэгістрацыю РПГА "Рух "За Свабоду", Міністэрства юстыцыі выкарыстала неадпаведную норму права. Гэта з`яўляецца падставай для анулявання рашэння Міністэрства юстыцыі як пазапраўнага, паведамляе прэс-служба руху.

Лідэр РПГА «Рух «За Свабоду» Аляксандр Мілінкевіч лічыць рашэнне Мінюста палітычна матываваным. «Мы за легальную дзейнасць і калі ўлада пазбаўляе нас гэтага права, яна парушае закон, парушае нашы правы, якія прапісаныя ў Канстытуцыі. Гэтае рашэнне ідзе ў агульным рэчышчы палітыкі беларускіх улад, накіраванай на прыгнечанне грамадзянскай актыўнасці і закрыцці ўсіх легальных структур у краіне, акрамя падкантрольных улады»,– сказаў палітык.