Беларусь прадасць Чавесу расейскія ракеты? :: Хартыя'97 :: Навiны

Беларусь абвясціла пра намер паставіць Венесуэле ўзбраенні на 1 млрд. дал. Эксперты сумняваюцца ў здольнасці Беларусі задаволіць такі попыт самастойна, піша “Независимая газета”.

Пра тое, што Менск і Каракас да канца месяца павінны падпісаць кантракт «па тэматыцы вайсковага супрацоўніцтва» на 1 млрд. дал., стала вядома ад дзяржаўнага сакратара Савета бяспекі Беларусі Віктара Шэймана. Беларуская дэлегацыя цягам некалькіх дзён працавала ў Каракасе, і вынікам стала заключэнне шматмільённых кантрактаў.

На думку вайсковых экспертаў, гэтакі маштабны праект выклікае сумненні. «Я не вельмі ўяўляю, што мы можам прадаць на такую суму», – сказаў «НГ» беларускі палітолаг Андрэй Фёдараў. Ён прыгадаў, што ў свой час, прадаўшы Пяру партыю «МІГаў», Беларусь выгандлевала ўсяго толькі 300 млн. дал. На думку Фёдарава, гаворка можа ісці пра транзіт узбраення праз Беларусь, і ў першую чаргу расейскага.

Аднак, як атрымалася высветліць «НГ», у «венесуэльскай здзелцы» гаворка можа ісці пра мабільны зенітна-ракетны комплекс (ЗРК) СА-300П, для якога на Менскім заводзе цяжкіх цягачоў вырабляюцца шматвосевыя шасі. Толькі С-300 мог мець на ўвазе Уга Чавес, калі казаў пра намер абзавесціся «уражлівай сістэмай СПА, якая валодае ракетамі з далёкасцю 200 км». Кошт такой сістэмы ў залежнасці ад камплектацыі складае 0,8–1,2 млрд. дал. У 2006 годзе ў Беларусь з Расеі былі пастаўленыя чатыры комплексы С-300 для адзінай сістэмы супрацьпаветранай абароны РФ і Беларусі. Адпаведна вызваліліся комплексы, якія належалі Менску, пакінутыя яшчэ з савецкіх часоў, зробленыя ў 1980-я гады, і адзін або два з іх пасля рамонту цалкам могуць быць рэалізаваныя.

На думку дырэктара расейскага Цэнтра аналізу стратэгій і тэхналогій Руслана Пухава, Беларусь – не фінальны вытворца большасці відаў абароннай прадукцыі, таму гаворка пойдзе пра тое, што будзе вырабляцца беларусамі ў кааперацыі з Расеяй. «Але фармальна гэта будзе запісанае як чыста беларуская прадукцыя», – растлумачыў Пухаў «НГ». Палітолаг Андрэй Фёдараў дадае, што Менск – традыцыйнае акно для шэрагу экспарту расейскіх узбраенняў, калі Масква не хоча гэта рабіць наўпрост. «А сапсаванаму іміджу Беларусі складана нашкодзіць, тым больш што супрацоўніцтва Менска і Каракаса носіць маштабны характар», – сказаў ён.