«Белая Русь» агучыць непапулярныя рашэнні ўлады? :: Хартыя'97 :: Навiны

Палітолаг Уладзімір Мацкевіч у каментары “Народнай волі” лічыць, што раскрутка руху “Белая Русь”, якая назіраецца цяпер у краіне, невыпадковая. ”Усё гэта вельмі нагадвае савецкія агітацыйныя кампаніі, калі нейкі ініцыятыве ўлады надавалі агульнанародны характар”, – гаворыць Мацкевіч.

“У перыяд барацьбы з алкагалізмам узнікла Таварыства цвярозасці, у перыяд абвастрэння варожасці з Ізраілем ствараўся антысіаністскі камітэт пад кіраўніцтвам генерала Драгунскага і г.д. Гэта дастаткова распаўсюджаная практыка савецкай ідэалагічнай працы. Калі такія арганізацыі створаныя, яны могуць выкарыстоўвацца па розных падставах, ад іх могуць зыходзіць розныя ініцыятывы, яны становяцца легітымнымі пры вылучэнні кандыдатаў у дэпутаты, фармуюць свае фракцыі ў парламенце і акрамя таго ім даручаюць весці працу з насельніцтвам”, – лічыць палітолаг.

Мацкевіч мяркуе, што актыўнае стварэнне “Белай Русі” звязанае з магчымымі эканамічнымі цяжкасцямі, якія пхаюць Беларусь да змены ідэалагічнага кірунку. Сёння актуальная і проста неабходная лібералізацыя ў эканоміцы, а рэжым проста так не можа змяніць эканамічны курс. Трэба, каб яму падказаў народ. Для агучвання “народных ініцыятыў” і ствараецца праўрадавы рух.

”Калі Рубінаў робіць рэзкі ўхіл ад праваслаўя да атэізму, гэта больш-менш лагічна. Лагічна ў тым сэнсе, што для беларускага рэжыму, які грунтуецца на постсавецкай ідэалогіі, альянс з праваслаўем быў хутчэй мезальянсам. А вось паварот ад сацыялістычнай размеркавальнай эканомікі да лібералізацыі і рынкавага стану, гэта нелагічна для рэжыму. Хтосьці павінен яго да гэтага падштурхнуць. Гэтым кімсьці павінен стаць народ, а пажаданням народа рэжым не можа не пайсці насустрач”, – выказвае меркаванне Мацкевіч.

Другі момант, гэта Захад і Расея. Калі толькі Лукашэнка будзе “паліваць” Расею, рана ці позна гэта будзе выклікаць нейкае сумненне, скепсіс і непрыманне электарату, які яго падтрымлівае. Таму менавіта народныя масы павінны асудзіць Расею.