Расея адкладае рашэнне аб крэдыце :: Хартыя'97 :: Навiны

Выдзяленне Расеяй стабілізацыйнага крэдыту Беларусі адкладаецца. Як паведаміла «Росбалту» інфармаваная крыніца ў расейскім урадзе, на перамовах паміж прэм`ерамі Расеі і Беларусі Міхаілам Фрадковым і Сяргеем Сідорскім дадзенае пытанне абмяркоўвалася сярод іншых, але бакі не прыйшлі да канчатковага рашэння.

Ідзе ўзгадненне пазіцый, бакі прапрацоўваюць найбольш вострыя пытанні , – сказаў суразмоўца агенцтва. Пры гэтым ён не ўдакладніў, калі гэтае пытанне можа быць вырашанае канчаткова, паведамляе ІА «Росбалт».

Прэм`ер-міністр РФ Міхаіл Фрадкоў па выніках перамоваў з сваім беларускім калегам заявіў журналістам, што бакі абмеркавалі пытанні супрацоўніцтва ў нафтагазавай і фінансавай сферах і дамовіліся працягнуць гэтую працу. «Пытанні складаныя, у адзін момант не вырашаюцца, узялі на хатнюю прапрацоўку асобныя пункты магчымых будучых дамоўленасцяў. Давялі адзін да аднаго аргументы бакоў, будзем прымаць іх да ўвагі пры разглядзе гэтых пытанняў» , – сказаў расейскі прэм`ер.

Ён адзначыў таксама, што паралельна працуюць гаспадарчыя суб`екты Расеі і Беларусі. «Спадзяюся, што яны дасягнуць неабходных дамоўленасцяў, якія будуць укладзеныя ў кантэкст жадання падвышаць эфектыўнасць на міжурадавым узроўні ў гандлёва-эканамічных стасунках» , – дадаў Фрадкоў.

Памер крэдыту можа скласці ад $1 млрд. да $1,5 млрд. у выпадку, калі расейскі бок прыме гэтую прапанову. Беларусь мае намер выдаткаваць сродкі на паляпшэнне аплатнага балансу і фінансаванне двухбаковага гандлю, у прыватнасці, на куплю расейскіх энерганосьбітаў. Сродкі будуць скарыстаныя на фінансаванне выдаткаў бюджэту, якія павялічыліся праз рост цэн на расейскія энерганосьбіты, або на рэфінансаванне астатку доўгу па раней выдзеленых расейскіх дзяржаўных крэдытах.