Ціск упадзе ва ўсёй трубе? :: Хартыя'97 :: Навiны

"Газпром" мае намер скараціць пастаўкі газу ў Беларусь з прычыны даўгоў Менска перад расейскай газавай манаполіяй. Аднак пад пагрозай зрыву можа апынуцца графік паставак блакітнага паліва ў Заходнюю Еўропу.

Як заявіў прэс-сакратар кіраўніка "Газпрома" Сяргей Купрыянаў: "Беларусы нічога не прапанавалі, ніякіх варыянтаў развязання праблемы доўгу, які цяпер складае $456 млн. Мы разглядаем гэта як парушэнне ўмоў дамовы ад 31 снежня, дзе ёсць пункт наконт таго, што калі яны не плацяць, мы зніжаем пастаўкі. Мы будзем дзейнічаць згодна з дамовай. З 3 жніўня мы знізім пастаўкі прыкладна на 45%, але транзіт у Еўропу захаваецца ў поўным аб`ёме".

На думку кіраўніцтва «Газпрома», нягледзячы на абмежаванне паставак Менску, «Белтрансгаз» абавязаны згодна з кантрактам забяспечыць бесперашкодны транзіт расейскага газу па сваёй тэрыторыі ў трэція краіны.

Між іншым, падобная сітуацыя – спыненне паставак з Расеі ў Беларусь газу ўзімку 2004 года – ужо двойчы прыводзіла да таго, што Менск забіраў транзітныя энерганосьбіты, прызначаныя еўрапейскім спажыўцам.

Судзячы па ўсім, Расея мае на гэты конт пэўную боязь. "Газпромэкспорт" накіраваў замежным спажыўцам газу апавяшчэнне аб абмежаванні паставак газу ў Беларусь. У прэс-рэлізе "Газпрома" гаворыцца, што робяцца ўсе магчымыя меры для транспартоўкі расейскага газу праз тэрыторыю Беларусі ў поўнай адпаведнасці з наяўнымі абавязальніцтвамі перад еўрапейскімі пакупнікамі.

Па матэрыялах «Коммерсантъ»