Эксперт: Лукашэнка не разумее, на чым грунтуецца сучасная эканоміка :: Хартыя'97 :: Навiны

Пра пэрспэктывы разьвіцьця беларуска-расейскіх дачыненьняў у сьвятле намеру “Газмпрому” зьнізіць з 3 жніўня на 45 працэнтаў падачу газу карэспандэнт “Радыё Свабода” размаўляе з аглядальнікам часопісу “Economist” Эдам Лукасам.

“Я чакаю, што яны дасягнуць пагадненьня. Праўдападобна, Беларусь пойдзе на чарговыя саступкі ў пытаньні продажу “Белтрансгазу” – за тое, каб “Газпром” пагадзіўся на мякчэйшыя ўмовы аплаты пастаўлянага газу”, – выказвае меркаваньне Эдам Лукасам

Эксперт раіць Беларусі пазбаўляцца энэргаемістых вытворчасцяў, каб зьнізіць для сябе наступствы падаражэньня расейскага газу. “Абсалютна відавочна, што́ Беларусь мае рабіць. Па-першае, адмаўляцца ад энэргаёмістых відаў вытворчасьці, скарыстоўваць газ больш абдумана, разважліва. Іншыя краіны, якія купляюць газ па высокай цане, стараюцца выкарыстоўваць яго больш ашчадна. З прычыны эксцэнтрычнай Лукашэнкавай манеры кіраваньня беларуская эканоміка не прайшла належнай рэструктурызацыі. У беларускіх уладаў было шмат часу, каб перабудаваць сыстэму выкарыстаньня энэргіі, але яны гэтага не зрабілі. І цяпер за гэта расплачваюцца. Але ўсё яшчэ можна зрабіць”, – лічыць аглядальнікам часопісу “Economist”.

Высокія цэны на газ прымушаюць людзей, і гэта добра, быць больш ашчаднымі. Грузія прадэманстравала нам, што постсавецкая эканоміка можа функцыянаваць пасьпяхова. Трэба толькі правесьці дывэрсыфікацыю і навучыцца эканоміць”.

Эд Лукас вельмі высока ацэньвае пэрспэктывы беларускай эканомікі ў разе яе лібэралізацыі. “Я думаю, трагедыя ў тым, што Лукашэнка не разумее выгадаў эканамічнага рэфармаваньня. Ён бачыць толькі горшы бок. Ён не разумее, на чым грунтуецца сучасная эканоміка. Ён не ўсьведамляе да канца, што ягоная краіна знаходзіцца ў вельмі добрым месцы і магла б напраўду быць надзвычай цікавай для інвэстараў. Беларусь магла б мець вельмі сьветлую будучыню, але вельмі цяжка паверыць, што ў Беларусь пры Лукашэнку можа прыйсьці неабходная адкрытасьць, бо ягоны рэжым трымае ўсё пад кантролем”, – падсумоўвае эксперт.