Ці дапамогуць банкі? :: Хартыя'97 :: Навiны

Белгазпрамбанк гатовы прыцягнуць для ААТ "Белтрансгаза" да 500 млн. даляраў для аплаты запазычанасці за пастаўлены ў Беларусь у першым паўгоддзі прыродны газ, паведаміў учора на прэс-канферэнцыі ў Менску старшыня праўлення Белгазпрамбанка Віктар Бабарыка.

"Магчымасць прыцягнення для Белтрансгаза да 500 млн. даляраў існуе і ўвасобленая ў пэўную прапанову", – сказаў старшыня праўлення. Па яго словах, "ужо цяпер вызначанае патэнцыйнае кола ўдзельнікаў для арганізацыі сіндыкаванага крэдыту". Між іншым ён падкрэсліў, што для арганізацыі запазычання неабходная згода пазычальніка, "гэта павінна быць узаемная гатоўнасць".

На яго думку, магчымыя некалькі варыянтаў вырашэння праблемы неплацяжоў: беларускі бок можа аплаціць доўг за кошт уласных рэсурсаў, прыцягнуць крэдытныя рэсурсы з расейскага боку і прыцягнуць сродкі з-за меж Расеі і Беларусі.

Нацбанк Беларусі таксама выказаў гатоўнасць праканвертыраваць сродкі ў беларускіх рублях для аплаты доўгу за газ.

Расейскія эксперты адзначаюць, што хоць грошы на аплату газу ў Беларусі ёсць, але калі Менск загасіць запазычанасць перад расейскай манаполіяй, у яго не застанецца сродкаў на падтрымку датацыйнай беларускай эканамічнай мадэлі, што можа істотна падарваць уяўны сацыяльны дабрабыт і аўтарытэт кіраўніцтва краіны.