Беларусі плаціць няма чым :: Хартыя'97 :: Навiны

“Беларусь мае надзвычайна вялікія запазычанасьці па даўгах замежным кампаніям. Таму мы лічым, у Беларусі мала грошай і сапраўды плаціць няма чым”, – кажа аналітык брытанскага дасьледчага цэнтру Global Іnsight Натальля Лешчанка.

“Пазыцыі Расеі і Беларусі і іх стасункі з Эўропай будуць залежыць ад іміджавай вайны. Ці Расея здолее пераканаць Эўразьвяз, што Беларусь дзейнічае не ў адпаведнасьці са сваімі абавязкамі, ці беларускі ўрад паспрабуе стварыць вобраз Расеі, як дзяржавы, якая пагражае сувэрэнітэту Беларусі?” – лічыць Натальля Лешчанка.

Шмат таксама будзе залежыць ад таго, што будзе рабіць Аляксандр Лукашэнка. Ён апынуўся паміж Сцылай і Харыбдай, бо калі ён будзе адбіраць расейскі газ, які ідзе транзытам у Эўропу, ён цалкам закрые магчымасьць паляпшэньня адносінаў з Эўразьвязам, на якую ён арыентаваўся, як на альтэрнатыву адносінам з Расеяй, паведаміла “Радыё Свабода” Натальля Лешчанка.

Аналітык лічыць, што ў Беларусі сапраўды няма грошай. “Наша кампанія Global Іnsight на мінулым тыдні зьнізіла сувэрэны рэйтынг Беларусі да сытуацыі магчымага дэфолту. Паводле нашай інфармацыі ў краіне сапраўды вялікія праблемы з ліквіднасьцю. Праўда, зьнешняя запазычанасьць даволі малая, таму што Беларусі няшмат даюць крэдытаў. Але Беларусь мае надзвычайна вялікія запазычанасьці па даўгах замежным кампаніям, паводле нашых падлікаў гэта 92 мільёны расейскім кампаніям і 193 мільёны даляраў па-за межамі СНД. Таму мы лічым, у Беларусі мала грошай і сапраўды плаціць няма чым”, – кажа аналітык брытанскага дасьледчага цэнтру.