Аляксандр Мілінкевіч: Адбываецца злачынны патаемны гандаль :: Хартыя'97 :: Навiны

Сёння за спіной беларускага народу адбываецца злачынны патаемны гандаль, які вядзе да распродажу нацыянальнага багацця і да страты суверэнітэту. У чарговы раз грамадзяне Беларусі сталі закладнікамі няздольнасці рэжыму асабістай улады весці адказную і эфектыўную знешнюю і ўнутраную палітыку, гаварыцца ў заяве аднаго з лідэраў дэмакратычных сілаў Аляксандра Мілінкевіча ў сувязі з чарговым газавым канфліктам

Мілінкевіч лічыць, што за прыгожымі лічбамі афіцыйнай статыстыкі хаваецца банкруцтва і некампетэнтнасць кіроўных колаў паслядоўна адстойваць нацыянальныя інтарэсы і праводзіць неабходныя эканамічныя рэформы.

Насельніцтва і прадпрыемствы ўжо даўно плацяць па рынкавых коштах за карыстанне газам, а выгандляваная ў Расіі розніца застаецца вузкаму колу прыўладных чыноўнікаў.

Прымаюцца келейныя дамоўленасці, схаваныя ад грамадскага кантролю. Рашэнне аб продажы Белтрансгазу - нацыянальнага здабытку ўсяго народа – было прынятае закрытым чынам насуперак жаданню абсалютнай большасці грамадзянаў Беларусі і ва ўрон нацыянальным інтарэсам.

Усё больш відавочнай становіцца тупіковасць і нежыццяздольнасць мадэлі развіцця Беларусі, якую насаджае Лукашэнка. Поўны крах палітычнага курсу ў адносінах з Расійскай Фэдэрацыяй востра ставіць пад пагрозу незалежнасць і суверэнітэт Беларусі.

Ва ўмовах эканамічнага і палітычнага ціску з боку палітычных колаў суседняй дзяржавы першачарговай задачай з`яўляецца ўмацаванне нацыянальнага адзінства праз шырокі дыялог ўнутры беларускага грамадства.

Абавязковыя ўмовы такога дыялогу – гэта спыненне палітычных рэпрэсіяў і вызваленне палітвязняў, стварэнне пераходнага ўраду народнага даверу, у склад якога павінны ўвайсці прадстаўнікі дэмакратычных сілаў краіны і які павінен распачаць эканамічныя і дэмакратычныя пераўтварэнні, змена выбарчага заканадаўства, фармаванне новай Цэнтральнай выбарчай камісіі і правядзенне датэрміновых прэзідэнцкіх і парламенцкіх выбараў пад эгідай АБСЕ, гаворыцца ў заяве палітыка.

Крыніца: Milinkevich.org