Лукашэнка: Дай Бог, каб расейцы сябе паводзілі як кітайцы :: Хартыя'97 :: Навiны

Беларусь можа выкарыстаць досвед Кітая ў розных сферах. Пра гэта заявіў учора Аляксандр Лукашэнка падчас стасункаў з калектывам рэдакцыі газеты "Советская Белоруссия".

“Мне ў Кітаі цікава ўсё. Сёння гэта краіна, якая хутка расце. Гэта амаль 2 млрд. чалавек. Іх трэба накарміць, апрануць, даць ім працу. Як высветлілася, я меў рацыю. У іх трэба было вучыцца”, – падкрэсліў Аляксандр Лукашэнка, як паведамляе БелТА.

Ён таксама адзначыў, што “гэтая краіна – узор для пераймання ўсіх дзяржаў свету ў той ці іншай ступені“. “Кітайцы паводзяць сябе з намі вельмі прыстойна. Калі нам цяжка, і мы ў іх чагосьці просім, яны нам заўсёды дапамагаюць. Дай Бог, каб расейцы сябе так з намі паводзілі”, – падкрэсліў Лукашэнка. Кіраўнік краіны паінфармаваў, што ў Кітаі на ўзроўні кіраўніцтва краіны вырашанае, што яны заўсёды будуць гатовыя падтрымаць Беларусь, нават калі ў нейкіх выпадках для кітайскага боку гэта будзе невыгоднае.

Акрамя таго, Беларусь зацікаўленая ў супрацоўніцтве з Кітаем у інвестыцыйнай сферы. “Кітай прапаноўвае нашай краіне крэдыты пад смешны працэнт – 2% гадавых. Дзе вы бачылі такі працэнт? Нам Расея сёння на газ прапаноўвае крэдыт пад 8,5% гадавых”, – сказаў кіраўнік дзяржавы. “Гэта ж камерцыйны крэдыт. Мы сёння ў любой краіне возьмем гэты крэдыт”, – адзначыў ён.

Па словах Аляксандра Лукашэнкі, Кітай дасягнуў сваіх поспехаў за кошт неймавернай працы насельніцтва. “На жаль, мы забылі пра тое, што толькі дзякуючы такой працы мы можам дасягнуць багацця”, – сказаў кіраўнік дзяржавы.