Ода Чавесу пад заказ :: Хартыя'97 :: Навiны

У Гомелі напісаны "Венесуэльскі дзённік". Аўтарамі зборніка пад такім назовам сталі гомельскія паэты і празаікі, якія прысвяцілі свае творы Венесуэле і яе прэзідэнту. У тым, што твор быў заказаны ўладамі, сумненняў не ўзнікае.

Як сёння распавяла карэспандэнту БелТА адна з асноўных удзельніц праекту – паэтка Лілія Вялічка, ідэя стварыць такі зборнік узнікла пасля віртуальнага знаёмства праз Інтэрнэт і літаратуру з гісторыяй і культурай Венесуэлы. Па словах суразмоўцы, віртуальная Венесуэла яе настолькі ўразіла, што на свет з`явіўся цэлы зборнік вершаў і прозы. Сярод аўтараў, прадстаўленых у "Венесуэльскім дзённіку", Эма Прыбыльская, Вольга Раўчанка, Яраслаў Ісачоў. Тэмамі для творчасці сталі гістарычныя падзеі, філасофскія разважанні, знакавыя асобы.

Зборнік пакуль існуе ў кампутарным варыянце. Менавіта ў такім выглядзе аўтары адправілі яго ў амбасаду Баліварыянскай Рэспублікі Венесуэла ў Беларусі.

З амбасады стваральнікі зборніка атрымалі адказ пра тое, што іх творы цяпер перакладаюцца на гішпанскую мову для прадстаўлення зборніка прэзідэнту Венесуэлы Уга Чавесу.