Фэст «Be2Gether» у Літве будзе дабрачынным :: Хартыя'97 :: Навiны

Частка сродкаў ад продажу квіткоў на міжнародны фэст рок-музыкі «Be2Gether» («Будзьце разам»), будзе накіраваная на аздараўленне дзяцей Чачэрска (Гомельская вобласць), пацярпелых ад чарнобыльскай аварыі, паведамляе БелТА.

Фэст «Be2Gether» пройдзе 24–26 жніўня ў Літве. Ён адбудзецца ў 50 м ад беларуска-літоўскай мяжы ля падножжа Нарвілішкскага замка XVI стагоддзя і будзе прысвечаны 50-годдзю заснавання Еўрапейскай супольнасці. Плануецца, што фэст стане найбуйнейшым музычным мерапрыемствам у краінах Балтыі. На яго з`едуцца больш як 30 рок-гуртоў і выканаўцаў з усяго свету, у тым ліку з Беларусі, Літвы, Латвіі, Польшчы, Ісландыі, Фінляндыі, Украіны і Расеі. Як чакаюць, Беларусь будуць прадстаўляць «Ляпіс Трубяцкі» і «IQ48».

«Be2Gether», дэвіз якога «Музыка адкрывае межы», – выдатная магчымасць убачыць і пачуць гурты, якія прывабліваюць тысячы прыхільнікаў ва ўсім свеце. Гэта будзе не толькі музыка, але і ўражлівы музычны спектакль на раздарожжы некалькіх культур», – гаворыць адзін з арганізатараў фэсту Гедрус Клімкявічус.

Галоўная сцэна фэсту — самая вялікая ў Літве — 22 м на 14 м. Магутнасць гуку абяцае быць больш за 200 кілават. Танцавальны клуб (больш за 600 кв.м) будзе працаваць да 4 раніцы. У кемпінгу ў намётах змогуць размясціцца на начлег больш за 10 тыс. чалавек. Закрытая ахоўная аўтастаянка разлічаная амаль на 2 тыс. месцаў.