Шведы падтрымалі незалежныя прафсаюзы Беларусі :: Хартыя'97 :: Навiны

Незалежныя прафсаюзы Беларусі, і ў прыватнасці Беларускі прафсаюз працаўнікоў радыёэлектроннай прамысловасці (РЭП), у складаных умовах дзейнасці робяць "фантастычную працу". Такую ацэнку працы прафсаюзных актывістаў даў старшыня шведскага прафсаюза "IF Metal" Стэфан Лавен на прэс-канферэнцыі ў Менску 7 жніўня.

С.Лавен знаходзіцца ў Беларусі з двухдзённым візітам (6-7 жніўня) на запрашэнне Беларускага прафсаюза працаўнікоў радыёэлектроннай прамысловасці.

Шведскі прафсаюзны дзеяч адзначыў, што ў Беларусі існуюць "вельмі складаныя ўмовы для дзейнасці незалежных прафсаюзаў", таму ён быў здзіўлены, калі "падчас гутарак пачуў масу прыкладаў дапамогі з боку незалежных прафсаюзаў пэўным людзям", паведамляе БелаПАН.

Як адзначыў С.Лавен, міжнародныя прафсаюзныя сувязі "становяцца ўсё больш важнымі ў святле працэсаў глабалізацыі". "Сёння фактычна існуе толькі адна сіла, якая можа абараніць інтарэсы працаўнікоў, – незалежныя прафсаюзныя арганізацыі. Грамадства ўсё больш адчувае ў іх сілу, якая рэальна змагаецца за лепшую будучыню чалавека", – сказаў С.Лавен.

Старшыня прафсаюза "IF Metal" таксама паведаміў, што ўпершыню наведаў Беларусь у 2003 годзе. "Наколькі я ведаю, колькасць прафсаюза РЭП за гэты час фактычна не змянілася. Аднак я ўпэўнены, што гэта адбываецца не з прычыны іх дрэннай працы з працаўнікамі, а ў сувязі з складанымі ўмовамі, у якія пастаўленая іх дзейнасць", – заявіў ён.

С.Лавен паабяцаў беларускім калегам дапамогу ў іх дзейнасці і наладжванні далейшых кантактаў з міжнароднымі прафсаюзнымі арганізацыямі.