Апазіцыя і ўлада могуць адкрыць беларусам шлях у Еўропу :: Хартыя'97 :: Навiны

«Імкненне вырашыць візавыя праблемы – гэта прыклад непрамога супрацоўніцтва паміж уладай і апазіцыяй. Гэта сведчыць пра тое, што мы можам працаваць у адным кірунку. Дэмакратычныя сілы даўно спрабавалі вырашыць гэтую праблему і добра, што цяпер падключыліся ўлады. У Расеі і Украіне гэтыя пытанні ўжо вырашаныя – візавы рэжым палегчаны», – заявіў сёння на прэс-канферэнцыі ў Менску міжнародны каардынатар Хартыі’97, былы намеснік міністра замежных спраў Беларусі Андрэй Саннікаў, каментуючы дзеянні беларускіх улад па паніжэнні кошту шэнгенскіх віз для беларусаў.

Старшыня аргкамітэта руху “За Свабоду!” Аляксандр Мілінкевіч таксама нагадаў на прэс-канферэнцыі, што лідэры апазіцыі паднімалі пытанне неабходнасці палягчэння візавага рэжыму для беларусаў на шматлікіх сустрэчах з кіраўнікамі краін Еўропы.

“Кожны з нас на ўсіх сустрэчах у Еўропе заклікаў знізіць кошт віз для беларусаў. Але ў Еўропе ёсць нармальныя дэмакратычныя працэдуры. Для развязання гэтых пытанняў да еўрапейскіх структур павінна звярнуцца ўлада. Чаму гэтыя праблемы вырашаныя ў Расеі і Украіне? Таму што афіцыйныя ўлады дзейнічалі. І беларускі ўрад сёння таксама можа вырашыць гэтыя вельмі важныя пытанні. Тут у нас з уладай цалкам супадаюць пазіцыі”, – адзначыў Мілінкевіч.