Праз цэны на газ падаражэе навучанне ў ВНУ :: Хартыя'97 :: Навiны

"Пытанне змянення аплаты навучання ў ВНУ пакуль не абмяркоўваецца", – паведаміў першы намеснік міністра адукацыі Рэспублікі Беларусь Аляксандр Жук на прэс-канферэнцыі 13 жніўня ў Менску. Тым не менш, прадстаўнік Мінадукацыі не выключыў, што падвышэнне кошту магчымае, "бо гэта звязанае і з коштам энерганосьбітаў і іншых рэчаў, хоць сітуацыя дастаткова стабільная і рэгулюецца ўрадам".

"Калі і будуць нейкія змены, то яны будуць малаважнымі, у межах некалькіх адсоткаў", – адзначыў намеснік міністра. У той самы час А.Жук сказаў, што, "магчыма, варта падумаць пра кошт навучання, бо сёння ён ніжэйшы, чым рэальныя выдаткі ВНУ на падрыхтоўку адпаведных спецыялістаў", – паведамляе БелаПАН.

Па яго словах, пытанні змены платы за навучанне агаворваюцца ў адпаведнай дамове паміж абітурыентам або яго бацькамі (калі ён непаўналетні) і ВНУ. Кошт навучання вызначаецца ў залежнасці ад рэальных выдаткаў ВНУ на падрыхтоўку спецыяліста. "Зразумела, што на эканамічных і юрыдычных спецыяльнасцях ён будзе ніжэйшым, чым на тэхнічных або медыцынскіх, што звязана з адпаведнай лабараторнай базай", – адзначыў А.Жук.

На прэс-канферэнцыі таксама было зададзенае пытанне пра забяспечанасць іншагародніх студэнтаў жыллём. Па словах першага намесніка міністра адукацыі, гэтая праблема актуальная галоўным чынам для сталічных ВНУ. У прыватнасці, летась у Менску ў сярэднім па ВНУ 63% студэнтаў былі забяспечаныя інтэрнатамі. "Мы робім намаганні, каб адрамантаваць наяўныя інтэрнаты, быў праведзены конкурс на лепшы інтэрнат", – адзначыў А.Жук. З мэтай паляпшэння сітуацыі, якая склалася ў цяперашні час таксама разглядаецца пытанне аб будаўніцтве студэнцкай вёскі.