Багданкевіч: Лукашэнка ўсё далей адыходзіць ад ідэі стварэння «саюзнай дзяржавы» :: Хартыя'97 :: Навiны

«Я думаю, што гэтае палітычнае рашэнне», – так пракаментаваў у інтэрв`ю «Белорусскому партизану» экс-кіраўнік Нацыянальнага банку Станіслаў Багданкевіч рашэнне беларускіх улад адмовіцца з 2008 года ад "прывязкі" прагнозу курсу беларускага рубля да расейскага.

Эксперт нагадаў, што раней кіраўніцтва Беларусі разглядала пытанне пра тое, каб пераходзіць у ацэнцы курсу беларускага рубля, зыходзячы з «кошыка» валют, у якую, акрамя расейскага рубля, уваходзілі бы даляр і еўра. «Гэта найбольш разумнае з пазіцыі эканомікі рашэнне», – лічыць экс-кіраўнік Нацыянальнага банка.

С.Багданкевіч адзначыў таксама, што не бачыць у гэтым рашэнні якіх-небудзь пагроз для стабільнасці беларускай валюты. «Справа ў тым, што ўсе разлікі з Расеяй, прынамсі, па газе, нафце і па іншых асноўных групах тавараў вырабляюцца менавіта ў далярах, гэта значыць цана ў дамовах заўсёды паказвалася ў далярах, а не ў расейскіх рублях, – сказаў эксперт. – Іншая справа, што гэта ўсё няўчасна. Таму што цяпер расейскі рубель стабільны і толькі ўмацоўваецца. І мне не зразумелая адмова ў дадзены момант ад «прывязкі» да расейскага рубля пры ацэнцы курсу».

Экс-кіраўнік Нацбанку знаходзіць толькі адно разумнае тлумачэнне паводзін беларускіх улад: «Я думаю, што гэтае палітычнае рашэнне, звязанае з тым, што Лукашэнка ўсё далей адыходзіць ад ідэі стварэння “саюзнай дзяржавы” і пераходу на расейскі рубель. Бо стварэнне «саюзнай дзяржавы» было наўпрост звязанае менавіта з гэтым фактарам, з увядзеннем агульнай валюты ў выглядзе расейскага рубля. А цяпер Лукашэнку гэта абсалютна не трэба».

У Нацыянальным банку Беларусі планаванае рашэнне адмовіцца ад «прывязкі» да расейскага рубля пакуль не каментуюць, спасылаючыся на тое, што гэта пакуль толькі праект, які трэба перш ухваліць ураду, а пасля зацвердзіць Лукашэнку.