Кіраўнік Цэнтра Візенталя напісаў ліст Лукашэнку :: Хартыя'97 :: Навiны

Цэнтр Сымона Візенталя апублікаваў пасланне Аляксандру Лукашэнку. У ім кіраўнік габрэйскай праваабарончай арганізацыі па міжнародных сувязях Шымон Самуэльс выказаў сваё абурэнне фактам свабоднага распаўсюджвання ў краіне антысеміцкіх выданняў. Пра гэта паведамляе выданне "Die Judishe".

У пасланні доктара Самуэльса, у прыватнасці, гаворыцца, што калі ён знаходзіўся з візітам у рэгіёнах былога СССР, аб`язджаючы мемарыяльныя ўчасткі Другой сусветнай, ён наведаў таксама і менскі музей Вялікай Айчыннай вайны, у якім немалая частка экспазіцыі прысвечаная знішчэнню беларускіх габрэяў нацыстамі і мясцовымі жыхарамі, якія з імі супрацоўнічалі.

Аднак, знайшоўшы недалёка ад музея кніжны шапік, у якім абсалютна свабодна прадаюцца кнігі антысеміцкага зместу, Самуэльс прыйшоў у жах.

Кіраўнік лос-анджэлескага цэнтра адзначыў цэлы шэраг кніг, распаўсюджванне якіх, на яго думку, недапушчальнае. Сярод іх – "Міфы і праўда аб пагромах" і "Таямніца сіонскіх пратаколаў: Змова супраць Расеі" Алега Платонава і "Габрэйская рэвалюцыя" Мікалая Жэвакова

Прадстаўнік Цэнтра Візенталя ў сваім пасланні запатрабаваў ад Лукашэнкі "афіцыйна асудзіць антысемітызм і гарантаваць ліквідацыю з продажу друкаваных матэрыялаў, якія абражаюць памяць габрэяў і беларусаў – ахвяр Другой сусветнай вайны".