Пракуратура супраць журналіста :: Хартыя'97 :: Навiны

Віцебскія пракуроры па-ранейшаму не знаходзяць падстаў для ўзбуджэння крымінальнай справы супраць Ніны Шубінай – старшыні выбарчай камісіі, якая не дазволіла журналісту «Народнай волі» Валерыю Шчукіну выконваць прафесійныя абавязкі.

Гэтымі днямі Беларуская асацыяцыя журналістаў атрымала ад пракурора Першамайскага раёна г.Віцебска Васіля Ягорава ліст, дзе сцвярджаецца, што «праверка па матэрыяле праведзеная «поўна і аб`ектыўна», і «падстаў для прыняцця мераў пракурорскага рэагавання» няма.

2 жніўня БАЖ накіраваў зварот пракурору Віцебскай вобласці Г.Дыско з просьбай разабрацца ў абставінах парушэння правоў журналіста Валерыя Шчукіна старшынёй выбарчай камісіі ўчастку №52 Віцебска Нінай Шубінай падчас выбараў у мясцовыя саветы 2007 года. Аднак абласная пракуратура чарговым разам перанакіравала гэты зварот у ніжэйшую інстанцыю.

Нагадаем, 12 студзеня падчас датэрміновага галасавання Н.Шубіна заявіла карэспандэнту недзяржаўнай газеты «Народная воля» В.Шчукіну, што яму дазваляецца працаваць на гэтым участку толькі цягам адной гадзіны, і ўручыла журналісту адпаведны дакумент з сваім подпісам.

Між іншым, юрысты АТ «Беларуская асацыяцыя журналістаў» не аднойчы звярталі ўвагу пракурораў на тое, што Н.Шубіна сваімі дзеяннямі парушыла нормы, замацаваныя ў арт.39 Закона аб друку і выбарчым заканадаўстве.