Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Намесніца кіраўніка Адміністрацыі прэзідэнта Наталля Пяткевіч 14 жніўня абраная старшынёй Беларускай федэрацыі горналыжнага спорту і сноўборду (БФГСС).
Адначасова федэрацыя ператвораная ў Асацыяцыю "Беларуская федэрацыя горналыжнага спорту і сноўборду". Яе заснавальнікамі выступілі 10 арганізацый.
Раней федэрацыю доўгі час узначальваў Ігар Юдзін, майстар спорту СССР, сябра зборнай СССР па горналыжным спорце. 17 траўня гэтага года ён раптоўна сканаў на 50-м годзе жыцця. 29 траўня выканаўцам абавязкаў кіраўніка БФГСС быў прызначаны Уладзімір Трафіменка, генеральны дырэктар УП "СЭНС". 17 ліпеня было заснаванае Грамадскае аб`яднанне аматараў горналыжнага спорту і сноўборду Рэспублікі Беларусь. Стварэнне гэтага аб`яднання паводле заканадаўства было неабходным этапам стварэння асацыяцыі. Адначасова ўсе паўнамоцтвы федэрацыі рашэннем агульнага сходу былі дэлегаваныя будучай асацыяцыі.
На прынцыпах асацыяцыі працуе Беларуская федэрацыя футбола, якую ўзначальвае кіраўнік Адміністрацыі прэзідэнта Генадзь Нявыглас.
БФГСС была адной з нешматлікіх федэрацый па алімпійскіх відах спорту, узначаленых не службоўцам высокага рангу.
