МЗС Польшчы заявіў пратэст беларускім уладам :: Хартыя'97 :: Навiны

Міністэрства замежных спраў Польшчы заявіла пратэст надзвычайнаму і паўнамоцнаму амбасадару Беларусі ў Польшчы Паўлу Латушку ў сувязі з забаронай на ўезд у Беларусь польскім парламентарыям.

«Увечары 15 жніўня амбасадар Павел Латушка быў выкліканы ў польскі МЗС, дзе яму быў заяўлены пратэст», — паведаміла БелаПАН намесніца начальніка ўпраўлення інфармацыі – начальніца аддзела прэс-службы МЗС Марыя Ваньшына.

Нагадаем, што 15 жніўня на памежным пераходзе «Брузгі» беларускія памежнікі забаранілі ўезд на тэрыторыю рэспублікі віцэ-спікеру Сената Польшчы Кшыштафу Путры, лідэру апазіцыйнай партыі «Грамадзянская платформа» Дональду Туску і дэпутату польскага Сойма Роберту Тышкевічу. Польскія палітыкі ехалі ў Гародню для ўдзелу ў мерапрыемствах з нагоды нацыянальнага свята — Дня Войска Польскага.

Як вынікае з тлумачэння афіцыйнага прадстаўніка памежнага перахода «Брузгі», «дадзеныя дзеянні цалкам адпавядаюць міжнародным нормам, у прыватнасці артыкулу 90 2-га пункта Венскай канвенцыі аб міжнародных стасунках, які абвяшчае, што дзяржава прыбыцця мае права адмовіць ва ўездзе некаторай катэгорыі грамадзян».

У афіцыйным каментары МЗС Беларусі сцвярджалася: «Беларускі бок загадзя папярэдзіў польскі бок, што некаторым яе прадстаўнікам, якія плануюць ажыццявіць паездку ў Гародню, будзе адмоўленае ва ўездзе ў краіну».