Мінюст рэгіструе клубы аматараў рэтра-аўтамабіляў і кошак :: Хартыя'97 :: Навiны

Міністэрства юстыцыі Беларусі адрапартавала, якія арганізацыі былі зарэгістраваныя ў Беларусі сёлета. Ніводнай праваабарончай арганізацыі і апазіцыйнага палітычнага аб`яднання зарэгістраванае не было. Спіс тых, хто прайшоў рэгістрацыю, гаворыць сам за сябе.

У ліпені 2007 года Міністэрствам юстыцыі Рэспублікі Беларусь зарэгістраваныя 2 новыя грамадскія аб`яднанні: Міжнароднае грамадскае моладзевае харавое аб`яднанне "Камертон" і Грамадскае аб`яднанне аматараў горналыжнага спорту і сноўборду (якое ўзначаліла намесніца кіраўніка адміністрацыі прэзідэнта Наталля Пяткевіч – заўв. Хартыі’97).

Міжнароднае грамадскае моладзевае харавое аб`яднанне "Камертон" створанае з мэтай садзейнічання выхаванню падрастаючага пакалення Беларусі праз фармаванне яго духоўнасці сродкамі харавой культуры, беларускай нацыянальнай і хрысціянскай музыкі, а таксама прапаганды айчыннай харавой культуры.

Мэтай Грамадскага аб`яднання аматараў горналыжнага спорту і сноўборду з`яўляецца развіццё горналыжнага спорту і сноўборду ў Беларусі, а таксама стварэнне спрыяльных умоў для раскрыцця творчых і спартовых магчымасцяў асоб, якія займаюцца горналыжным спортам і сноўбордам.

Міністэрствам юстыцыі Рэспублікі Беларусь у ліпені 2007 года таксама зарэгістраваныя Статуты ў новых рэдакцыях 10 рэспубліканскіх і міжнародных грамадскіх аб`яднанняў. Сярод іх: Беларускае грамадскае аб`яднанне аматараў кошак "Ясь і Яніна", Грамадскае аб`яднанне "Беларуская федэрацыя трыатлону", Грамадскае аб`яднанне "Беларуская федэрацыя аматарскага бокса", Беларускае артадантычнае грамадскае аб`яднанне, Беларускае грамадскае аб`яднанне прафесійнага бокса, Беларускае грамадскае аб`яднанне ветэранаў цяжкай атлетыкі, Міжнароднае грамадскае аб`яднанне выпускнікоў і апекуноў МРТІ-БДУІР, Грамадскае аб`яднанне "Беларускае ваенна-паляўнічае таварыства", Рэспубліканскае грамадскае аб`яднанне "Беларускае таварыства тэрапеўтычных радыёлагаў-анколагаў", Грамадскае аб`яднанне "Беларуская спартовая федэрацыя глухіх".

Органамі юстыцыі таксама зарэгістраваныя 9 новых мясцовых грамадскіх аб`яднанняў. Сярод іх: Грамадскае аб`яднанне "Клуб аматараў рэтрааўтамабіляў "Адам", якое створанае з мэтай аб`яднання грамадзян, інтарэсы якіх звязаныя з рэтрааўтамабілямі і Грамадская арганізацыя "Магілёўскае таварыства абароны жывёл", якая створаная ў мэтах прапаганды гуманных адносін да свету жывёл; аказання дапамогі зацікаўленым асобам у абароне хатніх і безнаглядных жывёл ад жорсткага звароту з боку чалавека; памяншэння колькасці безнаглядных жывёл гуманнымі метадамі.