Андрэй Саннікаў: «Толькі еўрапейскі напрамак можа выратаваць Беларусь» :: Хартыя'97 :: Навiны

Дэмакратычныя сілы падалі ў Менскі гарвыканкам заяўку на правядзенне Еўрапейскага Марша. Яго асноўнай мэтай з`яўляецца дэманстрацыя імкнення беларускага грамадства да цывілізаванага, еўрапейскага тыпу развіцця краіны.

Сярод заяўнікаў «Еўрапейскага Марша» вядомыя ў краіне палітыкі: кіраўнікі Партыі БНФ Вінцук Вячорка і Віктар Івашкевіч, старшыня АГП Анатоль Лябедзька, лідэр руху «За свабоду» Аляксандр Мілінкевіч, моладзевыя актывісты Яўген Афнагель і Зміцер Хведарук. Аргкамітэт акцыі падтрымалі практычна ўсе дэмакратычныя партыі і грамадскія арганізацыі Беларусі, паведамляе «Нямецкая хваля».

Дэмакратычныя сілы з дапамогай гэтай кампаніі накіроўваюць беларускім службоўцам сігнал пра тое, што апазіцыя гатовая весці перамовы па правядзенні дэмакратычных рэформ з улікам іх інтарэсаў. Па словах міжнароднага каардынатара Хартыі’97, экс-намесніка міністра замежных спраў Беларусі Андрэя Саннікава, еўрапейскі выбар для краіны сёння непазбежны:

«З улікам таго, што цяпер адбываецца вакол Беларусі, у самой Беларусі, змена ўлады з`яўляецца проста непазбежнай. Нам неабыякава, як гэта будзе адбывацца: пад ціскам Крамля ці праз пошук кампрамісу, праз дыялог унутры краіны. Таму мы лічым, што толькі еўрапейскі напрамак можа выратаваць краіну, вырашыць пытанне аб энергетычнай, эканамічнай і палітычнай бяспецы незалежнай Беларусі».

Пра тое, што дэмакратычныя сілы не хочуць канфрантацыі з уладамі падчас правядзення акцыі, сведчыць і тое, што такія вядомыя дзеячы, як Міхаіл Марыніч, Юры Хадыка, Андрэй Саннікаў і іншыя, будуць наўпрост звяртацца да высокіх службовых асоб, паведаміў старшыня аргкамітэта Еўрапейскага Марша Віктар Івашкевіч:

«Прынятае рашэнне стварыць спецыяльную перамоўную групу, якая ўвесь час да акцыі будзе хадзіць на прыём у гарвыканкам, Саўмін, адміністрацыю прэзідэнта і пераконваць улады ў тым, што ім выгодна правесці поўнамаштабны Еўрапейскі Марш мірна».

Еўрапейскі Марш павінен прайсці 14 кастрычніка. Ініцыятары акцыі плануюць сабраць яе ўдзельнікаў у 14.00 на Кастрычніцкай плошчы ў цэнтры Менска і па ходніках прайсці да пляцоўкі каля Нацыянальнай бібліятэкі, дзе павінен адбыцца мітынг.